“Төрүт түөлбэм төлкөтө” пуорум эһиил Дьокуускайга ыытыллыаҕа

Бу ый саҥатыгар  Амма улууһугар  тоҕус улуустан уонна Дьокуускай куораттан 120 киһи кыттыылаах “Төрүт түөлбэм төлкөтө” өрөспүүбүлүкэтээҕи пуорум үһүс төгүлүн буолан ааспыта. 

Суолталаах тэрээһин туһунан Горнай улууһун Бэрдьигэстээх сэлиэнньэтин “Эйэ” түөлбэтин салайааччыта Жанна Парфенова бу курдук кэпсээтэ:

— Пуорумҥа сүрүн болҕомто үөрэнии-үөрэтии былаһааккатыгар уурулунна. Манна СӨ ыччат дьыалатыгар уонна социальнай коммуникацияҕа министиэристибэтин исписэлиистэрэ грант үбүлээһинин боппуруостарыгар, Ресурснай кииннэр үлэлэрин уонна “Электроннай бюджет” диэн порталы туһаныыга сүбэ-ама биэрдилэр.   Ураты болҕомто Олохтоох бэйэ салайыныы тэрээһинин уопсай оҥкулларын 33 №-дээх федеральнай сокуонугар уурулунна.
Пуорум  кыттыылаахтарыгар анаан Амма бөһүөлэгин билиһиннэрэр экскурсия тэрилиннэ. Олохтоохтор көҕүлээһиннэрин бырагырааматынан  тутуллубут эбийиэктэри көрөн, олус кэрэхсээтибит. Ордук болҕомтону “Тэтим”  түөлбэ  дьоҕус паарката ылла. 2024 сыллаахха Бүтүн Арассыыйатааҕы  уопсастыбаннай эйгэ  күрэс кыайыылааҕынан тахсан,  50 мөлүйүөн солкуобай сүбүлээһиҥҥэ тиксибит. Бырайыак идиэйэ быһыытынан  Бэрдьигэстээххэ ыытыллыбыт бастакы пуорумҥа аан бастаан үөскээбит. Ол баҕа санаа ымыытын  түөлбэ салайааччыта салгыы сайыннаран, бырайаык суруйан, Арассыыйа таһымыгар тиийбиттэр.  Билигин бырайыак олоххо киирэн эрэр. Бу буолар олохтоох көҕүлээһини туһанан, норуот санаабытын толоруутун холобура. Эһиил Аммаҕа “Тэтим” дьоҕус паарка үлэҕэ киирэн,  бар дьону үөрдүөҕэ.
Пуорумҥа ТОСтар олоххо киирбит бырайыактарын быыстапкаларын күрэстэһиитэ буолла. Манна түөлбэ салайааччылара хаачыстыбата үрдүүрүгэр туһуламмыт араас хабааннаах, хайысхалаах үлэлэрин кэпсээтилэр, көрдөрдүлэр.

Барыта 18 ТОС кыттыыны ылла. Быыстапка кыайыылааҕынан Горнай улууһун Бэрдьигэстээх сэлиэнньэтин  “Эйэ” түөлбэтэ буолла. Уопсастыбаннай тэрилтэҕэ  бастыҥ бырайыагын иһин 20 000 сууммалаах сэртипикээти туттардылар. 

  “Бастыҥ түөлбэ” күөн күрэскэ “Бигэ туруктаах түөлбэ” бочуоттаах аакка 25 сылын бэлиэтээбит Бэрдьигэстээх сэлиэнньэтин “Сардаҥа” түөлбэтэ тигистэ. “Ситиһиилээх түөлбэ” ааты Амма сэлиэнньэтиттэн “Тэтим” ТОС ылла. “Бастыҥ түөлбэ салайааччыта” номинация хаһаайынынан Тааттаттан “Теплица” ТОС салайааччыта Диана Соломонова буолла Кыайыылаахтар 15000 солкуобай сууммалаах сэртипикээттэри туттулар.

Пуорум күүтүүлээх саҥа сүүрээнинэн “ТОС-фандрайзинг” социальнай көҕүлээһиҥҥэ күрэхтэһии буолла. Бу күрэс уратыта – пуорум кыттыылаахтара бэйэлэрэ кыттыспыт үптэринэн  сөбүлээбит бырайыактарын наҕараадалыылар. Бэрдьигэстээхтэн 2 ТОС кытынна: “Эйэ” түөлбэ (сал. Парфенова Ж.Е.): “Cаха балаҕана – ыалдьыттааһын, ыалдьытымсах буолуу эйгэтэ” бырайыагынан; “Эбэ” түөлбэ (сал. Сергеева В.А.) “Айаҥҥа уопут үллэстэ” бырайыагынан. Манна араас хайысхаҕа 15 бырайыак кытынна.  Кыайыылааҕынан Таатта улууһун Орто-Амма нэһилиэгин “Теплица” түөлбэтин “Дьиэ кэргэҥҥэ — сылааһы” бырайыага ааттанна уонна 166 000 солкуобай суумалаах харчынан өйөбүлү тутта.  Бу үп пуорум кыттыылаахтарыттан киирбит үп уонна 50 000 солк. – Бэрдьигэстээхтэн урбаанньыт, “Южный” эргиэн киинин салайааччыта Федор Попов спонсордаабыт харчыта буолар. Пуоруму көҕүлээн уонна тэрийэн ыыттылар СӨ ыччат дьылатыгар уонна социальнай коммуникацияҕа министиэристибэтэ, Амма улууһун дьаһалтата уонна СӨ ТОСтарын Ассоциациятын бырабылыанньата. Сүрүн тэрийээччи – Саха сирин түөлбэлэрин Ассоцияциятын бэрэссэдээтэлэ, Бэрдьигэстээх сэлиэнньэтин баһылыгын солбуйааччыта Ксения Васильева.

Түмүктүүр пленарнай мунньахха “Төрүт түөлбэм төлкөтө – 2025” пуорум резолюцията куоластааһынынан бигэргэтилиннэ. Бастыҥ түөлбэлэрбит Ил Дархан, Саха Өрөспүүбүлкэтин бырабыыталастыбатын, Ыччат миниистирин, Бүтүн Арассыыйатааҕы ТОС-тар Ассоциацияларын наҕараадаларын туттулар.

Эһиил “Төрүт түөлбэм төлкөтө – 2026” пуорум Дьокуускай куоракка ыытыллыаҕа.