Тиэлигилэр хорсун-хоодуот уолларынан киэн тутталлар

Бу күннэргэ байыаннай дьайыы кыттыылааҕа, Мэҥэ Хаҥалас Тиэлигититтэн төрүттээх Лаврентий Степанов дьоруойдуу быһыытын туһунан сонун Арассыыйаны тилэри көттө. Бу уол туһунан Тиэлиги баһылыга Иннокентий Исаковтан туоһуластыбыт:

— Лаврентий Тиэлиги төрүт олохтооҕо, 2001 сыллаахха ыам ыйыгар төрөөбүтэ. 2019 сыллаахха А.А.Пахомов аатынан Тиэлиги орто оскуолатын бүтэрбитэ, тута аармыйаҕа сулууспалыы барбыта.  Сулууспатын болдьоҕо бүтэригэр, байыаннай идэтин талан, хантараак баттаһан аармыйаҕа салгыы сулууспалыы хаалбыта. Бурятияҕа артиллерийскай чааска сулууспалаабыта. Байыаннай дьайыы саҕаланыаҕыттан сылдьар. Оҕо сылдьан сытыы-хотуу, бэйэтин кыанар уол этэ. 8-с кылааска көҥүл тустууга дьоҕурдааҕа биллэн, Харатааҕы спортивнай лиссиэйгэ үөрэнэ сылдьыбыта.  Ол үөрэнэ сылдьан, улууска оҕолорго тустууга кэккэ ситиһиилэрдээх. Үс оҕолоох дьиэ кэргэн орто оҕото, балтылаах, эдьиийдээх. Ийэтэ оскуолаҕа үлэлиир, аҕата олохтоох администрация суоппара. Уолбут туһунан сонуну олус үөрэ иһиттибит. Этэҥҥэ сулууспалаан, дойдутугар эргиллэрин күүтэбит.