Тиксиигэ баһаарга аҕам саастаах дьахтар эмсэҕэлээбит

Ааспыт өрөбүллэргэ Тиксии бөһүөлэккэ Трусов уулуссаҕа биэс этээстээх олорор дьиэҕэ уот турбут. Баһаар түмүгэр 61 саастаах дьахтар эмсэҕэлээбит. Бу туһунан ЫБММ пресс-сулууспата иһитиннэрэр.

Уот турбутун туһунан иһитиннэрии бээтинсэҕэ киэһэ 18:14 чааска киирбит. Баһаарынайдар биир мүнүүтэнэн быһыылан тахсыбыт миэстэтигэр кэлбиттэр. Ол кэмҥэ подъездтан хойуу буруо тахсар эбит. Эмсэҕэлээбит дьахтар буруоттан сүһүрэн, Булуҥнааҕы киин балыыһаҕа киирбит. Кыбартыыра 15 квадратнай миэтэрэ иэнэ уокка былдьаммыт. Уоту умуруорууга баһаар сулууспатын түөрт үлэһитэ уонна биир анал тиэхиньикэ тардыллыбыт. Дьиэттэн биэс олохтоох дьон көһөрүллүбүт.

Оттон киин куоракка сэтинньи 16 күнүгэр Воинская уул., Үөһээ Бүлүүгэ Карл Маркс уул. баанньыктар умайбыттар. Баһаар төрүөтэ, буруйдаахтар уонна хоромньу быһаарыллар.