Тимофей Сметанин стелатыгар сибэкки дьөрбөтүн уурдулар

Кэбээйи улууһун уопсастыбаннаһа фронтовик суруйааччы Тимофей Сметанин төрөөбүтэ 105 сылыгар анаан бүгүн өйдөбүнньүк стелатыгар сибэкки дьөрбөтүн уурдулар.

Үөрүүлээх тэрээһиҥҥэ Аҕалар сэбиэттэрин уонна Кэбээйи улууһун култуураҕа управлениетын бэрэстэбиитэллэрэ кыттыыны ыллылар. Суруйааччы кыыһа Татьяна Тимофеевна Сметанина уонна кинилэр дьиэ кэргэттэрин бэрэстэбиитэллэрэ кыттыылара долгутуулаах буолла. Маннык саха норуотун биир чаҕылхай уолун үйэтитии тэрээһинэ мэлдьи ыытыллар.

Быйыл Тимофей Сметанин төрөөбүт үбүлүөйдээх сылын көрсө, Кэбээйи улууһун дьаһалтатын өйөбүлүнэн, «Улус.Медиа» кыттыытынан суруйааччы «Мэхээлэчээн булчут» айымньытынан уус-уран уонна музыкальнай киинэни уһуллулар.

Улуус Кыайыы 80 сылын көрсө, 2025 сылга диэри Дьокуускай куоракка фронтовик-суруйааччы Тимофей Сметанин стелатыгар, төрөөбүт Кэбээйи сэлиэнньэтин Чомчуһах алааһыгар тупсарыы үлэтэ ыытыллар.