Тохсунньу 24 күнүттэн Дьиэ кэргэн сылын арыйыы үөрүүлээх тэрээһиннэрэ саҕаланыахтара

Дьиэ кэргэн сылын  үөрүүлээхтик арыйыы  суолталаах тэрээһиннэрэ өрөспүүблүкэ улуустарыгар бу дьыл тохсунньу 24 күнүттэн олунньу 4 күннэригэр диэри ыытыллыахтара.

Бу туһунан РФ Бэрэсидьиэнэ биллэрбит Дьиэ кэргэн сылын туһунан эрэгийиэннээҕи  мунньахха иһитиннэрдилэр. СИА бэлиэтииринэн, тэрээһин боппуруостары дьүүллэһэр киэҥ ыҥырыылаах сүбэ-мунньаҕы СӨ Үлэ уонна социальнай сайдыы миниистирэ Елена Волкова куйаар ситиминэн кэмпириэнсийэ быһыытынан ыытта. Мунньахха улуустааҕы социальнай көмүскэл управлениеларын салайааччылара  кыттыыны ыллылар.

«Дьиэ кэргэн сылыгар ыал үгэстэрин арыйар, сырдатар, сайыннарар хайысхалаах тэрээһиннэри, араас пуорумнары, сийиэстэри, сүлүөттэри тэрийии, улуустарга холобур буолар дьиэ кэргэттэри кытта көрсүһүүлэри ыытыы, үлэ династияларын сырдатыы, дьиэ кэргэн айар киэһэлэрин тэрийии соруга турар», — диэн бэлиэтээтэ миниистир.

Онон бу күннэргэ бары улуустарга Дьиэ кэргэн сылын үөрүүлээхтик аһыы тэрээһиннэригэр бэлэмнэнии саҕаланна.