Томполор байыастарыгар 2 мөлүйүөн харчыны хомуйбуттар

Томпо нэһилиэгин  волонтердара анал байыаннай дьайыы кыттыылаахтарыгар көмө оҥоруу уопсастыбаннай хамсааһын аахсыйатыгар ис дууһаларыттан көхтөөхтүк кытталлар.

Муус устар ыйга  Томпо улууһун баһылыга Яков Степанов уонна улуустааҕы дьаһалта салайааччыта Владимир Илларионов анал байыаннай дьайыы зонатыгар тиийэн биир дойдулаахтарын көрүстүлэр. Байыастарга томполор байыаннай маллары, таҥаһы-сабы, аһы-үөлү уонна дьонноруттан баһыылкалары туттардылар диэн Томпо улууһун дьаһалтатын пресс-сулууспата суруйар.

Байыаннай дьайыы кыттыылаахтарын көрдөһүүлэринэн, кинилэргэ наадалаах квадрокоптердары, тепловизионнай прицеллары, дальномердары тиэртилэр. Маны таһынан байыастарга уоппускаҕа айан ороскуотун төлөбүрүгэр уу харчынан матырыйаалынай көмө харчыны туттардылар. Барыта холбоон бу сыалга нэһилиэнньэттэн уонна тэрилтэлэртэн 2 мөл. тахса солк. харчы хомуллубут.

Томполор биир дойдулаахтара байыаннай эпэрээссийэттэн этэҥҥэ эргиллэн кэлэллэригэр, байыастарыгар көмө тиһигин оҥорууну быспакка салҕыыллар.