Туймаада ыһыаҕар балаакка миэстэтин талыы саҕаланна

Бүгүн, ыам ыйын 20 күнүттэн,  “Туймаада ыһыаҕа-2024” национальнай бырааһынньык официальнай саайтыгар балаакка куоратыгар сайаапкалары ылыы саҕаланна.

Бу күнтэн ыла киин куорат олохтоохторо уонна ыалдьыттара ыһыах кэмигэр сынньалаҥнарын атааралларыгар табыгастаах усулуобуйаны тэрийэр инниттэн,  эрдэттэн балаакка миэстэтин таларга кыах бэрилиннэ. Бу туһунан Дьокуускай куорат дьаһалтатын пресс-сулууспата иһитиннэрэр.

Санаттахха, бу күннэргэ  “Туймаада ыһыаҕа-2024” национальнай бырааһынньык официальнай саайта үлэтин саҕалаабыта. Интэриэһиргиир дьон саайка ыһыах устуоруйатын, архыып матырыйаалларын, национальнай бырааһынньыгы тэрийии бэлэмэ хайдах ыытылларын, куонкурустар балаһыанньаларын, ыһыах бырагырааматын кытта билсиэхтэрин сөп. Саайты бу сигэнэн булуохха сөп: https://ysyakh.yakadm.ru/.