Турцияҕа 7000-тан тахса киһини быыһаатылар

Бэҕэһээ, олунньу 6 күнүгэр, Турция, Сирия оройуоннарыгар сарсыарда уонна күнүс сир хамсааһыннара буолан, хас да куорат эмсэҕэлээтэ. Бүгүн сарсыарда биллибитинэн, Турцияҕа уонна Сирияҕа сир хамсааһыныгар өлбүт дьон ахсаана 5000-тан таҕыста.

Турция ыксаллаах быһыыны-майгыны сэрэтиигэ, туоратыыга управлениета бүгүн сарсыарда биэрбит дааннайынан, сир хамсааһыныгар 3381 киһи суорума суолламмыт, 20436 киһи эчэйбит.

Сир хамсааһына буолбута биир суукка ааста. Үгүс киһи сууллубут дьиэлэр сэмнэхтэрин анныгар сытар. Быыһааччылар, мэдиссиинэ үлэһиттэрэ тохтоло суох үлэлииллэр. Турция куораттарыттан баҕа өттүнэн көмөлөһөөччүлэр тиийдилэр.

Турцияҕа тас дойдуттан үгүс исписэлиис кэллэ. Арассыыйаттан ЫБММ икки сөмөлүөтэ бөлүүн көтөн кэлэн, тута эмсэҕэлээбит оройуоннарга тиийдэ.

Японияттан эмиэ анал бөлөх кэлэн, сир хамсааһынын үөрэтэ сылдьар.

Дьон өлүүлээх сир хамсааһына буолан, Турцияҕа олунньу 12 күнүгэр диэри кутурҕан биллэрилиннэ, судаарыстыбаннай тэрилтэлэр бары былаахтарын түһэрдилэр. Өрөспүүбүлүкэҕэ олунньу 13 күнүгэр диэри оскуолалар үлэлээбэттэр.