Тыа хаһаайыстыбатыгар өр сылларга үлэлээбиттэр үрдүк биэнсийэни ылаллар

Саха сиригэр тыа хаһаайыстыбатыгар өр сылларга үлэлээбит ыстаастаах 2800-тэн тахса киһи  үрдүк биэнсийэни ылар. Маннык өйөбүлү Арассыыйа социальнай пуондатын Саха сиринээҕи отделениета тыа хаһаайыстыбатыгар 30-тан итэҕэһэ суох сыл үлэлээбит уонна эбии төлөбүр оҥоһуллар кэмигэр тыа сиригэр олорор үлэлээбэт биэнсийэлээхтэргэ оҥорор.

Бу туһунан Саха Өрөспүүбүлүкэтигэр Арассыыйа социальнай пуондатын отделениетын управляющайа Марина Герман кулун тутар 18 күнүгэр брифиҥҥэ иһитиннэрдэ.

«Үрдээһин кээмэйэ кырдьаҕаһынан эбэтэр инбэлиитинэн страховой биэнсийэ олохтоммут төлөбүрүн 25% тэҥнэһэр. Ол 2025 сылга — — 2 226 солкуобай,  үһүс группалаах инбэлиитинэн биэнсийэни ылааччыга — 1 113 солкуобай. Төлөбүр кээмэйин биэнсийэлээх киһи судаарыстыбаннай өҥөлөр порталларыгар тус кэбиниэтигэр киирэн көрүөн сөп. Үрдэтиллибит төлөбүр биэнсийэлээх киһи атын сиргэ көһөн барбытын да иһин, оннунан хаалар”, — диэн Марина Герман быһаарда.

Эбии төлөбүрү ылар бырааптаах дуоһунастар уонна исписэлиистэр испииһэктэригэр 500-тэн тахса идэ киллэриллибит. Ол иһигэр, механизатордар, массыынанан ыаһын маастардара, тыа хаһаайыстыбатын массыыналарын өрөмүөннүүр силиэсэрдэр уо.д.а. бааллар.

Марина Герман быһаарбытынан, маныаха сайабалыанньаны  суруйуу ирдэниллибэт.  Үрдүк биэнсийэни ылар быраап страховка биэнсийэтин оҥорторуу уонна үтүөлээх сынньалаҥҥа тахсар кэмнэргэ  бэриллэр.