Ааптар хаартыскаҕа түһэриитэ
Бүгүн, муус устар 5 күнүгэр, Саха сирин тыатын хаһаайыстыбатын табаары оҥорооччуларын сийиэһэ саҕаланна. Сийиэс икки күн тигинэччи барыа.
Сийиэскэ 400 тахса дэлэгээт кыттыыны ылар. Тэрээһин бастакы күнэ үс хайысханан: «Сүрүн тэрээһиннэр» мунньахтан, «Тыа хаһаайыстыбатын кэпэрэтиибин сойууһун «Агроконтроль» Арассыыйа бэйэтин салайынар кэтээн көрөр сойууһун» уонна «2023с. судаарыстыбаннай өйөбүл хайысхалара» семинардарыттан саҕаланна.
Күн бастакы аҥарыгар, сийиэс чэрчитинэн, тыа хаһаайыстыбатын сүрүн үлэлэригэр муниципальнай тэриллиилэрин уонна куорат уокуруктарын тыа хаһаайыстыбатын салалталарын салайааччыларын кытары СӨ Бырабыыталыстыбатын Бэрэссэдээтэлин солбуйааччы Михаил Никифоров уонна тыа хаһаайыстыбатын миниистирэ Александр Атласов көрүстүлэр.
Мунньах аһыллыытыгар СӨ Бэрэссэдээтэлин солбуйааччы Михаил Никифоров сийиэһинэн эҕэрдэлээтэ уонна тыа хаһаайыстыбатын өрөспүүбүлүкэҕэ көрдөрүүтүн туһунан кэпсээтэ.
«Ааспыт сылларга Саха сирэ тыа хаһаайыстыбатын хайысхатыгар Уһук Илиҥҥэ бастыҥнар кэккэлэригэр сылдьара. Ол гынан баран, Росстат дааннайынан оҥорон таһаарыыга уопсай түһүү көстөр. Быйылгы сыл икки ыйын түмүгүнэн, бары хайысхаҕа көрдөрүү кыччаабыта көстөр. Дьиҥинэн ыллахха, былаан туолар, ол гынан баран ыстаат отчуоту сөпкө толоруу кыаллыбат, инникитин онно эмиэ болҕомто ууруллара наада«, — диэн Михаил Никифоров эттэ. Салгыы уустук саас иһэринэн, бары бэлэм буолуохтарын, эрдэттэн дьаһаныахтарын наадатын тоһоҕолоон бэлиэтээтэ.
Тыа хаһаайыстыбатын миниистирэ Александр Атласов: «Маннык тэрээһин буолбатаҕа ыраатта. Көрдөрүүгэ доҕолоҥнооһун барарын үрдүнэн, отчуот кыаллыбат, холобур, түргэнник ситэр дьиэ кыылын иитиигэ көрдөрүүлээхпит, ол гынан баран ыстаат отчуокка киллэрбэттэр, итини барытын официально көрдөрүөххэ наада«.
Сүнньүнэн тыа хаһаайыстыбатын оҥорон таһаарааччыларын өйүүр судаарыстыбаннай боломуочуйалар боппуруостарын дьүүллэстилэр.
Кэпсэтиигэ тыа хаһаайыстыбатын салайааччылара нэһилиэктэр бэйэни салайыныыга киирбиттэрэ 20 сыл буолла, ол тухары тыа хаһаайыстыбата болҕомтоҕо ууруллубата диэн эттилэр. Баһылыктар үлэлэрин көрдөрүүтүн култууранан, успуордунан эрэ сыаналанар буолбутун бэлиэтээтилэр. Ол туһунан соторутааҕыта буолан ааспыт баһылыктар, дьокутааттар сийиэстэригэр эмиэ этэн ааспыттара эрээри, баһылыктар тыа хаһаайыстыбата биһиги боломуочуйабыт буолбатах диэбиттэрэ. Оттон тыа сирэ барыта тыа хаһаайыстыбатынан дьарыктанар улуустарынан ааттаналлар ээ, дьиҥэ. Онон баһылыктар быһаччы интэриэстээх буолуохтаахтар. Аны туран, сир реформатын саҥаттан көрүөххэ, туруорсуохха наада диэн этиннилэр. Тоҕо диэтэххэ, нэһилиэк дьаһалтата сири бас билэрэ сатаммат диэн буолла. Онно урут бааһынай буола сылдьан сири ылан баран көспүт дьон, билигин сирдэрин түүлээн олороллорун, ол иһин билигин үлэлии сылдьар бааһынайдар кыһалҕаны көрсөллөрүн холобурдаан кэпсээтилэр. Итини таһынан тыа хаһаайыстыбатын управлениетын исписэлииһин үлэтин көҕүлүүр тэрээһиннэр наадаларын эттилэр.
Граннарга киирсиигэ, үгүстүк эрдэ ылбыт дьон ылалларын бэлиэтээтилэр, итиниэхэ мэхэниисимин уларытан биэрэр ордук буолуоҕар, о.д.а. боппуруостарга тыа хаһаайыстыбатын салайааччылара санааларын эттилэр.
Биир үөрүүлээх сонунунан тыа хаһаайыстыбатын управлениетын үлэһиттэрин хамнастара үрдээбитин бэлиэтээтилэр.
Лев Павлов көҥүл тустууга юниордар истэригэр аан дойду чөмпүйэнээтигэр үрүҥ көмүс мэтээли ылары ситистэ. Кини…
Бүгүн, балаҕан ыйын 8 күнүгэр, Саха сирин соҕуруу, хотугулуу-илин, күнүс арҕаа улуустарыгар сорох сиринэн ардах,…
Бүгүн НТВ ханаал “Чудо” биэриитигэр Сунтаар улууһун Элгээйи орто оскуолатын үөрэнээччитэ, эдэр орнитолог, 11 саастаах…
Аҕыйах хонуктааҕыта Сунтаар улууһун Куокуну нэһилиэгэр Улахан Табаҕа киэҥ нэлэмэн, үрдүк үүнүүнү биэрэр бааһыната талах…
Оҕо барахсан хайа да кэмҥэ арахсыспат аргыһа – оонньуур буоллаҕа. Онон “Наука 0+” билим бэстибээлин…
Бу күннэргэ өрөспүүбүлүкэ улуустарыгар ититии сезона саҕаланан эрэр. Мэҥэ Хаҥалас улууһун пресс-сулууспата дьаһалта телеграм-ханаалыгар иһитиннэрбитинэн,…