Түөкүттэр видео-сибээһинэн эрийэр буоллулар

Биир суукка иһигэр Хаҥалас улууһун уонна Дьокуускай куорат олохтоохторо полицияҕа эрийэн үҥсүү түһэрдилэр.

Түөкүттэр  Дьокуускай куоракка олорор биэнсийэлээх дьахтарга Telegram нөҥүө баан үлэһитин аатыттан эрийбиттэр. Аферистар страховка туһунан кэпсээн баран, дьахтар баан офиһыгар баран уурумньу харчытын каартаҕа көһөрөрө наадатыгар  итэҕэппиттэр. Кинилэр кэпсэтии кэмигэр видео-сибээс көмөтүнэн силиэдэбэтэл буолан «кубулуммуттар». Дьахтар кыыһыгар кэпсээн баран,  түөкүннээһин сиэртибэтэ буолбутун дьэ  өйдөөбүт. Массыанньыктар икки күн иһигэр киниттэн 1,8 мөлүйүөнтэн тахса солкуобайы уорбуттар.
Онтон уһуйаан  үлэһитигэр  массыанньыктар «Судаарыстыбаннай өҥө» үлэһитин уонна силиэдэбэтэл аатыттан эрийбиттэр. Кинилэр смартфонугар MirPay сыһыарыыны киллэрэригэр, онно банкомат нөҥүө баан каартатын холбууругар уонна «куттала суох» счекка ыытарыгар эппиттэр. Ол түмүгэр дьахтар 300 тыһыынчатыттан ытыс соттубут.

ИДьМ пресс-сулууспатын матырыйаалынан