Түөкүттэргэ 7,4 мөлүйүөнү ыыппыт

Бырамыысыланнай тэрилтэ үлэһитэ түөкүттэргэ 7,4 мөлүйүөн солкуобайы ууран биэрбит. 35 саастаах киһи «инвестицияҕа харчыбын уган, хас да бүк эргитиэм» диэн чэпчэки харчыга итэҕэйэн, угаайыга киирэн биэрбит.

Кини кирэдьииттэриттэн уонна ипотекатыттан түргэнник босхолоно охсорго баҕаран, инвестициялаан улахан харчы өлөрүөм дии санаабыт. Түөкүттэр инвестиция исписэлиистэрэбит диэн албыннаабыттарын итэҕэйэн, төлөпүөн сыһыарыытын хачайдаабыт. Ону тэҥэ, баантан эбии кирэдьиит ылбыт уонна билэр дьонуттан иэс ылаттаабыт.

Хас да күн иһигэр кини түөкүттэргэ хаста да араас суумалаах харчыны ыыппыт. Онон уопсайа 7,4 мөлүйүөн солкуобайы илэ бэйэтинэн түөкүттэргэ биэрбит. Аны бу киһи эбии кирэдьиитин уонна иэһин төлүүрүгэр тиийэр.

Кэнники кэмҥэ “инвестиция” диэн өйдөбүл киэҥник тарҕанан эрэр. Бу эйгэҕэ киэҥ билиитэ-көрүүтэ суох, чэпчэки харчыны сырсан, эрэлэ суох тэрилтэлэргэ итэҕэйэн, түөкүттэргэ киирэн биэриэххэ сөп. Онон инвестициялыыр буоллахха, үчүгэйдик үөрэтэн, билэн-көрөн эрэ баран, эрэллээх тэрилтэлэргэ (бааннарга) харчыгытын угуҥ.