Түөкүттэри туттулар! Кимнээх эбиттэрий?

Cаха сиринээҕи ИДьМ холуобунай ирдэбилин управлениетын үлэһиттэрэ 2 түөкүнү туттулар. Бу дьон түөкүттэр бөлөхтөрүгэр киирэн, 80-тан тахса киһини албыннаан, буруйу оҥорбуттара билиннэ. Ол иһигэр, Дьокуускай куорат 74 саастаах олохтооҕуттан 6,7 мөлүйүөн солкуобайын уорбуттар.

ИДьМ пресс-сулууспата иһитиннэрэринэн, Башкортостан 18 уонна 20 саастаах олохтоохторун туппуттар. Кинилэр 74 саастаах дьахтары сыһыарыы хачайдаан, брокерскай счет аһарыгар уонна онно харчытын угарыгар күһэйбиттэр. Үрдүк дохуоту эрэннэрбиттэр. Онон бу биэнсийэлээх дьахтартан 6 мөлүйүөн 760 тыһыынча солкуобайын уорбуттар.

Бу эдэр дьон куратордарын ыйыыларынан атын дьонтон абоненнар нүөмэрдэрин, харчыларын ылан, куомуннаахтарыгар ыыталлар эбит. Кинилэр хонтуруоллуур счеттарынан Саха сирин биэнсийэлээх дьахтарын харчытын ыыппыттар. Ол харчыны банкоматтан устан ылан баран, куратордарын крипто-көһүлүөктэригэр ыыппыттара биллибит.

Силиэстийэлиир дьайыылары оҥорорго бу дьону Дьокуускайга аҕаллылар уонна силиэстийэлиир изоляторга хаайдылар.

Бу түөкүттэр Арассыыйа хас да эрэгийиэнигэр 80-тан тахса буруйу оҥорууга уорбаланаллар, холуобунай дьыалалар арыллыбыттара. Билигин буруйу оҥоруу ымпыгын-чымпыгын быһаарарга силиэстийэлиир үлэ ыытыллар диэн ИДьМ пресс-сулууспата иһитиннэрэр.