“Тымныы полюһа Өймөкөөн” IV кыһыҥҥы марафон саҕаланна!

“Тымныы полюһа Өймөкөөн” IV кыһыҥҥы экстремальнай сүүрүү марафона бүгүн, олунньу 11 күнүгэр, саҕаланна.

Бу суолталаах тэрээһини арыйыы сиэрэ-туома Томтордооҕу Оҕо спортивнай оскуолатыгар буолла. Тэрээһиҥҥэ биһиги уопсастыбаннай кэрэспэдьиэммит Дария Тихомирова сылдьан, сонунун кэпсээтэ:

— Бүгүн спортивнай оскуола саалатыгар сүүстэн тахса киһи тоҕуоруһа мустан, сүүрүүктэри Өймөкөөн тымныытын тулуйан, туруоруммут соруктарын ситиһиллэригэр алгыс сиэрэ-туома буолла. Марафоҥҥа 18 саастарыттан 84 саастарыгар диэри спортсменнар кытта сылдьаллар. Удмуртияттан, Владимиртан уонна Тверь куораттартан бааллар. Ол курдук, Удмуртияттан биллиилээх айанньыт, марафонец Руслан Шакин баар диэн эттилэр.

Бүгүн Өймөкөөҥҥө -51 кыраадыс тымныы. Онон сүүрүктэри тургутан күн-дьыл туран биэрдэ. Сүүрүү Өймөкөөн нэһилиэгиттэн саҕаланан баран, Томторго түмүктэниэҕэ. Ааттаах-суоллах спортсменнар ортолоругар “Тымныы полюһа» экстремальнай марафон 42 км кыайыылааҕа Василий Лукин, ультрамарафонец Василий Горбунов, Арассыыйа, Европа хас да төгүллээх  чөмпүйүөнэ Мария Неустроева, Өймөкөөн марафонун кыайыылааҕа Марина Седалищева, Кыргызстааҥҥа ыытыллыбыт дойдулар икки ардыларынааҕы  турнир призера Александра Митина, эмиэ бу полумарафон кыайыылааҕа Ариан Апросимов, бэтэрээннэргэ Европа алта төгүллээх чөмпүйүөнэ Варвара Макарова, ону тэҥэ Манчаары оонньууларын кыайыылааҕа Ульяна Слепцова бааллар. Быйыл иккис сылын килиимэт экстремальнай усулуобуйатиыгар марафон кыттыылаахтара сүүрүү иннинэ уонна кэнниттэн доруобуйаларын туругун чинчийиини барыахтара.  Бүгүн Өймөкөөн улууһугар 50 кыраадыс тымныы.

Сүүрүктэр 5, 10, 21¸42 км күөн күрэстэһэллэр. Абсолютнай кыайыылаахтарынан 21 км уонна 42 км сүүрбүттэр буолуохтара.

Бу суолталаах тэрээһин Арассыыйа биир кэлим спортивнай тэрээһиннэрин халандаарыгар киириэҕэ диэн тэрийээччилэр бэлиэтээтилэр.