Түүҥҥү кулууп таһыгар тахсыбыт иирсээнинэн бэрэбиэркэ ыытыллар

Дьокуускайга полиция үлэһиттэрэ Кальвица уулуссатыгар баар түүҥҥү кулууп  таһыгар эр дьон икки ардыларыгар тахсыбыт иирсээнинэн бэрэбиэркэ ыытар. Ол курдук эр дьон атааннаһыылаах   видео-устуу социальнай ситиминэн тарҕанна.

Бүгүн, балаҕан ыйын  7 күнүгэр, түүн  3 чаас  40 мүн. Дьокуускайдааҕы полиция 3-с нүөмэрдээх отделыгар мэдиссиинэ тэрилтэтиттэн иһитиннэрии киирбит. Ол курдук  Кальвица уулуссаҕа баар түүҥҥү кулууп таһыгар тахсыбыт иирсээн түмүгэр, 39 саастаах эр киһи  эчэйиини ылбыт.

Айдаан тахсыбыт сиригэр полиция сотрудниктара кэлэн, урут сууттана сылдьыбыт 46 саастаах олохтоох эр киһини быһаарса  отделга аҕалбыттар.

Барыллааһын быһыытынан, эр дьон икки ардыгар иирсээн тахсан, 46 саастаах эр киһи эмсэҕэлээччини быһах тутааҕынан охсуталаабыт.

Билигин туһааннаах түбэлтэнэн бэрэбиэркэ ыытылларын туһунан  @mumvdyakutskoe иһитиннэрдэ.