UCHUR сирэйэ — «Рэкетир» киинэ легендата Саят Исембаев

«Рэкетир» диэн культовай криминальнай киинэ саамай биллэр дьоруойа «Саян» – Саят Исембаев, үрдүкү технологиялаах таҥаһы-сабы оҥорор саха брендын UCHUR хампаанньа сирэйинэн буолла. Бу туһунан кини бэйэтин социальнай ситимнэригэр иһитиннэрдэ. Бу – эр киһилии майгы, үгэстэргэ убаастабыл уонна айылҕаҕа таптал курдук уопсай сыаннастарынан холбоспут икки култуура көрсүһүүтэ.

Күүс – кырдьыкка уонна… эрэллээх экипировкаҕа

Саят Исембаев – Казахстаҥҥа легендарнай киһи. Кини дьоруойа Саян Беккаримов бүтүн эпоха бэлиэтинэн буолбута. Ол гынан баран, олоххо актер экрантан атын. Кини эйгэтэ – Казахстан киэҥ нэлэмэн истиэптэрэ, хайалара уонна өрүстэрэ. Саят –  булчут уонна балыксыт, киниэхэ айылҕаҕа тахсыы – ис туругу харыстыыр уонна өбүгэлэри кытта ситимниир.

«Кини UCHUR бренды өйөөһүнэ – дьиҥнээх күүс куорат көстүүлэригэр буолбакка, тайҕа чуумпутугар уонна хайа тымныы тыалыгар үөскүүрүн бигэргэтэр. Кыылы-сүөлү уонна сири-дойдуну убаастааһыҥҥа», – диэн бренд бэрэстэбиитэллэрэ бэлиэтииллэр.

Саят «UCHUR» талбыта түбэспиччэ буолбатах — саха экипировката ураты дьоҥҥо анаан оҥоһуллубута дакаастыыр.

Аан дойду аренатыгар

Бренд төрүттээччитэ Юрий Николаевич Большаков 2025 сыл түмүгүн таһаарар, ол курдук,  хампаанньа аан дойдуга биллэр буолла. Бу сыл иһигэр бренд сүрдээх улахан хамсааһыны оҥордо:

Казахстан: Астанаҕа «UCHUR» фирменнэй маҕаһыына аһылынна, оттон KIOF быыстапкаҕа бренд олохтоох булчуттартан үрдүк сыанабылы уонна сөҕүүнү-махтайыыны ылла.

Аан дойду ырыынага: Хампаанньа Канаадаҕа атыылыыр точкалары арыйда уонна Соҕуруу Америка ырыынагар таҕыста.

Арассыыйа: Бородууксуйа Москва бастыҥ маҕаһыыннарыгар («Вавилон Молл», «Артемида») уонна Wildberries, Ozon курдук саамай улахан маркетплейстарга баар буолла.

«2025 сыл биһиги саҥа кирбиилэри арыйбыт кэммит буолла. Биһиги көннөрү улааппатыбыт – айылҕаҕа тапталбытын үллэһиннибит, Хоту дойду тыына уонна тыйыс айылҕа ыҥырыыта көстөр оҥоһуктары айдыбыт. Биһиги аныгы технологиялар уонна айылҕа истиилэ тэҥҥэ хаамсыахтарын сөбүн уонна оннук буолуохтааҕын көрдөрдүбүт», — диир «UCHUR» бренд төрүттээччитэ Юрий Большаков.

Көннөрү таҥастааҕар ордук — «Elegance» философията

Быйыл бренд «Elegance» диэн саҥа линейкатын – туһалаах өрүтүн сиэртибэлээбэккэ, истиили сыаналыыр дьоҥҥо аналлаах мааны outdoor таҥаһы – билиһиннэрдэ. Бу сырыылаах внедорожниктан эбэтэр бултууртан дьыалабыай көрсүһүүгэ барарга сөптөөх таҥас. Ол эрээри «UCHUR» – аҥардас биисинэс эрэ буолбатах. Бренд бэйэтин силиһигэр-мутугар бэриниилээх.

2025 сылга хампаанньа ситиһиилэрэ:

1. Манчаары оонньууларын генеральнай спонсора буолан, национальнай успуорт көрүҥнэрин зонатын тэрийдэ.
2. Хотугу төрүт омуктар култуураларын харыстаан, IV Табаһыттар сийиэстэрин уонна «Синилгэн» бэстибээли өйөөтө.
3. Дойду араас муннуктарыттан ытааччылары түмэн, «Учур» Куубагар ытыыга бэйэтин күрэхтэһиитин ыытта.

Итэҕэли үөскэтэр сирэйдэр

Саят Исембаев «UCHUR» таҥаһын кэттэҕинэ, кини биир улахан суолталаах санааны тириэрдэр — таҥас эрэбил сыанатын билэр дьоҥҥо бэрэбиэркэни ааспыт. 2025 сылга бренд амбассадордарын хамаандатыгар аан дойдуга биллэр атын булчуттар эмиэ киирдилэр, ол курдук Брайан Хоук (Grand Slam Club Ovis президенэ) уонна Мэтт Ван Вьюрен (Likhulu Safaris, Африка).

Ол гынан баран, СНГ олохтоохторугар чуолаан «Саян» уобараһа ордук чугас. Сөбүлээн көрөр киинэҥ дьоруойуон саха таҥаһыгар-сабыгар көрөр – аан дойду гиганнарын таһымыгар тахсыбыт эрэгийиэн брендинэн киэн туттуу төрүөтэ.

Саха сирэ уонна Казахстан – тыйыс айылҕалаах уонна күүстээх санаалаах дьонноох икки эрэгийиэн. «UCHUR» бренд бу сирдэри ситимниир далаһанан буолла. 

Бэлэмнээтэ Диана Сивцева