Учуутал удьуорун утумнаабыт Скрыбыкиннар күргүөмүнэн куоластаатылар  

Дьокуускай куорат кытыытынааҕы Тулагы-Киллэм нэһилиэгэр биир ытыктанар сис ыалынан, аймаҕынан, 170 сыл ыстаастаах учуутал удьуорун утумнаабыт Скрыбыкиннар буолаллар. Бу аймах эбэлэрэ, оҕолоро, сиэннэрэ биир ситимнээхтэр – учуутал династиятын салҕыыллар.

Педагог династиятын ытык киһитинэн эбэлэрэ РСФСР үөрэҕириитин туйгуна, СӨ Үтүөлээх учуутала Любовь Петровна Скрыбыкина буолар. Скрыбыкиннар, бас-көс, тумус туттар киһилэрин үтүө сүбэтинэн  учуутал династиялара үөрэхтээһин үтүө үгэстэрин утумнаахтык илдьэ кэллэ.

Скрыбыкиннар бүгүн Тулагы-Киллэмнээҕи 772-с  №-дээх быыбардыыр учаастакка сахалыы таҥаһы таҥнан, бары күргүөмүнэн кэлэннэр куоластаатылар. Бэлиэтээн эттэххэ, бүгүн Скрыбыкиннар 18 саастаах сиэннэрэ аан бастакытын куоластаата. Онон кинилэргэ бүгүҥҥү күн эмиэ олус суолталаах буолла.