Учууталлар учууталлара Трофим Мординовка үйэлээх бэлиэни туруордулар

Балаҕан ыйын 6 күнүгэр Аҕа дойду Улуу сэриитин бэтэрээнэ, үлэ бэтэрээнэ,  Таатта улууһун уонна  Орто-Амма нэһилиэгин бочуоттаах олохтооҕо, Саха АССР оскуолаларын үтүөлээх учуутала, Учууталлар учууталлара, өр сылларга үтүө суобастаах үлэтинэн дойдубут социальнай-экэнэмиичэскэй  сайдыытыгар  өҥөлөрүн иһин “Гражданскай килбиэн” бэлиэнэн наҕараадаламмыт, Харбалаах орто оскуолатын бастакы дириэктэрэ, ини-бии Мординовтартан кыралара Трофим Егорович Мординов төрөөбүтэ оруобуна 110 сыла буолла.

Бу бэлиэ күнү көрсө кини оҕолоро, сиэннэрэ  Хотолдьу алааска ытык бэлиэ туруорбуттарын аһыллыытыгар Орто-Амма уонна Амма нэһилиэгин дьоно-сэргэтэ, ыччаттара, оскуолаларын оҕолоро тоҕуоруһа мустан,  улахан суолталаах тэрээһин буолан ааста. Бу Хотолдьу алааһы  тула олорон доҕордоһон улааппыт Т.Е. Мординов, П. Р. уонна  П.Х. Мироновтар, В.К.Афанасьев уоттаах сэрииттэн эргиллэн кэлэн алаастарын булгунньаҕар  бэлиэ мас туруорбуттар эбит.  Ол мас эргэрэн сууллубутун оннугар Трофим Егорович оҕолоро аҕаларын  төрөөбүтэ 110, Улуу Кыайыы 80 уонна Аан дойду иккис сэриитэ түмүктэммитэ 80 сылларыгар анаан,  биир дойдулаахтарбыт,  хорсун  буойуттар сырдык ааттарын кэриэстээн,  аныгылыы үйэлээх бэлиэҕэ суруйан туруордулар.

Тэрээһин буойуттар сырдык ааттарыгар чуумпуруу мүнүүтэтиттэн саҕаланна. Ытык сир иччилэригэр аал уоту оттон сүгүрүйүү, көрдөһүү, арчылааһын сиэрин-туомун С.Н.Кулачикова-Намылҕа оҥордо. Салгыы  ытык бэлиэ сырдык сабыытын арыйан,   буойуттар оҕолоро, сиэннэрэ, аймахтара олус истиҥник ахтан-санаан аастылар. Алаас устуоруйатын СӨ үтүөлээх учуутала Валентина Викторовна Блахирова билиһиннэрдэ.

 Трофим Егорович Мординов сырдык аатыгар анабыл хоһооннор ааҕылыннылар. СӨ үтүөлээх учуутала Валентина Семеновна Кривошапкина хоһоонун  кини уһуйааччыта, 11 кылаас үөрэнээччитэ, Миша Спиридонов; тапталлаах учууталыгар анаабыт хоһоонун Мария Степановна Слепцова олус иэйиилээхтик  аахтылар. Олохтоох дьаһалта уонна Харбалаахтааҕы үөрэх холбоһугун  аатыттан үйэлээх бэлиэни туруорбуттарыгар Мординовтар аймахха махтал тыллар  уонна маннык хамсааһыннар салҕаналларыгар баҕа санаалар этилиннилэр.

Светлана ВИНОКУРОВА, Таатта Харбалаах