Уһулуччулаах комментатор

Ылдьаа Скрябин күрэхтэһии түһүлгэлэригэр кэпсиир-сырдатар куолаһын дьон барыта биһириир, ылынар. 1990-с сыллардаахха Чурапчыга Иван Ильич Попов дириэктэрдээх “Агропромстрой” бирииһигэр өрөспүүбүлүкэ мас тардыһыытын турнирын уу-сахалыы уус-уран хомоҕой тылынан саҥаран-иҥэрэн олус чаҕылхайдык ыыппыта. Көрөөччүлэр куттарын туппута.

Ити түгэнтэн өрөспүүбүлүкэ таһымнаах мас тардыһыыларын ыытара үтүө үгэскэ кубулуйбута. Төҥүлүгэ “Күүстээх Дэһээккин”, Кэптэнигэ “Мас Мэхээлэ”, Дьокуускайга “Көмүс мас”, Манчаары Баһылай спартакиадаларын, “Дыгын оонньууларын”, түһүлгэлэрин киэргэтэр-сэргэхситэр, өрө күүрдэр.

Олоҕун, үлэтин укулаата, ис хоһооно бүтүннүүтэ успуорка анаммыт буолан улаханнык көмөлөһөллөр. Сүүрүк-быһый быһыытынан Мэҥэ Хаҥалаһын, үөрэммит университетын соргулаахтык ааттаппыта күүс-көмө, тирэх буолаллар. Киһи эрэ барыта санаммат 200 м уонна 400 м ыарахан дистанцияларыгар Саха АССР норуоттарын VII Спартакиадатын чөмпүйүөнэ. 1974 сыллаахха “Саха АССР бастыҥ спринтерэ” анал бириис хаһаайына. Сибиир, Урал, Уһук Илин уонна Орто Азия Универсиадатын финалиһа. Улахан успуорка үгүс көлөһүнүн тохпут, этинэн-хаанынан билбит, кыайыы-хотуу көтөллөөх бастыҥ сүүрүк-быһый быһыытынан спортсменнары, тириэньэрдэри, тэрийэр-салайар эйгэ дьонун кытта ыкса алтыһан, үчүгэйдик билэттиир, успуорт “ис куукунатыгар буспут” буолан, тыла-өһө тахсыылаах, өйө-санаата чугас, сүрэҕинэн ылынар. Онуоха эбии, успуорт туһунан литэрэтиирэни, суруйуулары ааҕар, бибилэтиэкэҕэ сылдьарын сөбүлүүр, инньэ гынан, билэрэ-көрөрө элбэх. Ол билиитэ-көрүүтэ күрэхтэһиилэр хаамыыларын сырдатарыгар, комментатордыырыгар туһалыыллара дьэҥкэтик көстөллөр.

Үбүлүөйдээх 50 сааһын бэлиэтиир үөрүүлээх күнүгэр ыалдьыт быһыытынан ыҥырыллан дьиэтигэр-уотугар сылдьыбытым. Онно сурунаал-бэлиэтэнэр тэтэрээтигэр күрэхтэһиилэри көтүппэккэ сааһылаан сурунарын, таблица курдук өйдөнүмтүөтүк ыйарын сөхпүтүм. Буочара кыраһыабайа, бэйэтэ да тутта-хапта сылдьара, эҥкилэ суох бэрээдэгэ, уурбут-туппут курдук хомуна сылдьара, аккуратнайа дьикти этэ. Ол да иһин сыыһаны-халтыны таһаарары сөбүлээбэтин тута биллэрэр айылгылаах, сытыы этиилэри оҥорооччу, саҥаны-сонуну киллэртэрэ, туруорса сатыыр идэлээх, уопсай дьыалаҕа туһа буоллун диэн.

Успуорт эйгэтигэр саҥа сүүрээннэри киллэртиир үгэстээх. Видеокамера үөдүйэн эрэр кэмигэр видеокамеранан устууну баһылаабыта, буола турар күрэхтэһиилэри, тэрээһин дьаһаллары быһа эпииргэ таһаартыыр – эмиэ Ылдьаа Скрябин. Видео-сюжеттары оҥортоон устуоруйаҕа тиспитэ, аахтахха, элбээбит буолуохтаах. Ол былаһын тухары бэйэтэ редактордыыр, оҥорор-таҥар, кэпсиир-ипсиир, кырдьык да, дэҥҥэ көстөр, тарбахха баттанар, дэгиттэр суруналыыс.

Ылдьаа Ылдьыыс аата да этэринии уу сахалыы өйдөөх-санаалаах. Оннук да буолан, дьон туһа диэн олорор, уопсастыбаннай хабааннаах үлэлиир-хамсыыр. Оройуонун хомсомуолун, сопхуос идэлээх сойууһун, нэһилиэгин Сэбиэтин салайбыта. Сааһыран олорон билигин успуорт эйгэтигэр дьон сэҥээриитин ылар көдьүүстээх урбаанньыт. 2024 сылы түмүгүнэн “Успуорка сулууспалааһын” номинация лауреатынан буолла.

Олунньу 5 күнүгэр 72 сааһын томточчу туоларынан итии-истиҥ эҕэрдэбитин тиэрдэбит, айа-тута сырыт, чэгиэн-чэбдик сырыт, дьол-соргу тулалаатын диэн алгыспытын аныыбыт!

Баһылай Посельскай.