Урбаанньыттар үлэлэрин сайыннарарга кыаҕы биэрэр

Уһук Илин урбаанньыттара табаардарын Wildberries маркетплейсыгар рекламалыыр, таһаарар, ону сэргэ «Платформа роста» бырагырааманан көрүллүбүт логистикаҕа, үөрэххэ кыттар кыахтаныахтара. 

Бүтүн Арассыыйатааҕы далааһыннаах бырайыак Wildberries уонна Russ холбоһуктаах хампаанньаларынан олоххо киллэриллэр.

Уһук Илин брендин өйөөһүн механизмнарын, Уһук Илин федеральнай уокурук эрэгийиэннэрин кытта хардарыта сибээстээх үлэни Уһук Илини уонна Арктиканы сайыннарыы миниистирэ Алексей Чекунков уонна РВБ (Wildberries уонна Russ холбоһуктаах хампаанньа) салайааччыта Татьяна Кимс дьүүллэстилэр. Көрсүһүү Петербурга норуоттар икки ардыларынааҕы экэнэмиичэскэй пуорумҥа (ПМЭФ) буолла.

«Платформа роста» сыала — Арассыыйа эрэгийиэннэригэр урбаанньыттар көхтөөх буолууларын үрдэтии, Арассыыйа табаардарын оҥорон таһаарыы кээмэйин улаатыннарыы, ону сэргэ бэйэ биисинэһин сайыннарыыга табыгастаах усулуобуйаны тэрийии тиэмэтигэр болҕомтону туһаайыы. Бырайыагы 2024 сыллаахха ахсынньыга Wildberries уонна Russ хампаанньалар, стратегическай иницативалар ааҕыныстыбалара (АСИ) саҕалаабыттар. 2025  сыллаахха тохсунньуга бырагырааманы АСИ кэтээн көрөр сэбиэтин мунньаҕын кэмигэр РФ Бэрэсидьиэнигэр В.Путиҥҥа презентациялаабыттар.

—«Платформа роста» Уһук Илин урбаанньыттарыгар уонна кинилэр үүннэрэн таһаарбыт бреннэрин кэҥэтэргэ, далааһынныырга, эргитиини үрдэтэргэ, биисинэһи көҕүлүүргэ кыаҕы биэриэ, — диэн бэлиэтээтэ Алексей Чекунков.

Маркетплейс атыылааччыларга саҥа көдьүүстээх хайысхалары, ол иһигэр логистикаҕа, рекламаҕа, ырытан көрүүгэ уонна атыы-тутуу бары түһүмэхтэригэр биисинэһи салайарга сирдиир. Элбэх урбаанньыт  маркетплейстарга тахсыы аудиторияларын кэҥэтэллэригэр, атыыны-тутууну үрдэтэргэ көмөлөөҕүн бигэргэтэллэр.

Сиһилии https://www.sakha.gov.ru/news/6861 манна киирэн ааҕыҥ.

СӨ Ил Дарханын уонна яБырабыыталыстыбатын пресс-сулууспата