Саха сирин сир баайын хостуур эрэгийиэн курдук көрүү суох

“Ил Дарханныын кэпсэтии” биэриини Ил Дархан былырыын баччаларга дойду бэрэсидьиэнэ Владимир Путин кэлэ сылдьыбытыттан саҕалаата.

Кини туруорбут соруктара төһө туолан эрэллэрин кэпсээтэ.

“Бэрэсидьиэн таһаарбыт анал быһаарыыларыгар биир да сир баайын хостооһун туһунан этии суох. Барыта дьон хапытаалын, креативнай, инновационнай экэниэмикэни сайыннарыы туһунан этиллэр. Бу  Саха сирэ кэлиҥҥи кэмҥэ дьон дьоҕурун сайыннаран Арассыыйаҕа, аан дойдуга биллибитин туоһута буолар. Биһиги бэрэсидьиэммит Саха сирин көннөрү сир баайын хостуур эрэгийиэн курдук көрбөтүн, манна улахан талааннаах, элбэх омук олорор эрэгийиэнин быһыытынан сыаналыыра көһүннэ, инникитин Арассыыйаны сайыннарар кыахтаах диэн көрдөрдө”.

Владимир Путин бу сырыытыгар элбэх быһаарыы ылыллыбыта. Олор биһиэхэ эрэ буолбакка, Уһук Илин эрэгийиэннэригэр барытыгар сабыдыаллыыр.