Устиновтар Госдуума бэрэссэдээтэлин кытта көрүстүлэр

Элбэх оҕолоох Устиновтар дьиэ кэргэттэрэ хос эбэлэрин илдьэ, Москваҕа  Сойуустар дьиэлэрин Колоннай саалатыгар Госдуума бэрэссэдээтэлэ Вячеслав Володинныын көрүстүлэр. Москваҕа Дьиэ кэргэн сылын түмүктүүр тэрээһин чэрчитинэн, 85 эрэгийиэн дьиэ кэргэттэрин кытта көрсүһүү буолла. 

Устиновтар Амма улууһун Эмис нэһилиэгэр олороллор. Туйаара Петровна уонна Сергей Анатольевич уон оҕону — биэс кыыһы, биэс уолу төрөтөн, улаатыннардылар. Улахаттара бэйэлэрэ ыал буолан, сиэннэри бэлэхтээтилэр. Онон 16 сиэннээхтэр, саамай кыра сиэннэрэ 2 ыйдаах.

Устиновтар чөл олоҕу, спорду өрө туппут, айар куттаах дьон. Орто уоллара Герман Устинов көҥүл тустууга Саха сирин икки төгүллээх чөмпүйүөнэ, Дмитрий Коркин турнирын Кыһыл көмүс мэтээлин хаһаайына  буолар. Кийииттэрэ —ох саанан дьарктанар Кристина Тимофеева.

Туйаара Петровна оҕо саадыгар үлэлээбитэ, билигин биэнсийэҕэ тахсан, уопсастыбаннай үлэнэн дьарыктанар. Дьоруой Ийэ бэлиэтин Ил Дархан илиититтэн туппута. Кини ийэтэ Татьяна Никифоровна Новикова уонна эбэтэ Елена Петровна Новикова эмиэ уонтан тахсалыы оҕону төрөтөн, киһи-хара гыммыттара. Кинилэр Сэбиэскэй Сойуус саҕана Дьоруой ийэ буолбуттара. Онон удьуордаан туран, элбэх оҕолоохтор, Дьоруой Ийэлэр.

Сайын аайы Устиновтар дьиэлэрэ оҕо саҥатынан туолар. Кинилэргэ эбэлэрин уонна 85 саастаах хос эбэлэрин алаадьылара, күөрчэхтэрэ туохтааҕар да минньигэс.

Вячеслав Володин бу саалаҕа Арассыыйа бары муннуктарыттан дьоллоох дьиэ кэргэттэр мустубуттарын, дьиэ кэргэн тутула таптал уонна ытыктабыл буоларын туһунан эттэ. Дьиэ кэргэннээх буолан, хас биирдии киһи сарсыҥҥы күнүгэр эрэллээх, тирэхтээх, дьиэ кэргэн баар буолан, судаарыстыба күүстээх.