«Уютный дом» пансионакка бэрэбиэркэ ыытылынна

Дьокуускайдааҕы «Уютный дом» кырдьаҕастары көрөр-истэр чааһынай пансионакка мэдиссиинэ көмөтүн оҥоруу ирдэбиллэрэ толоруллубатахтара уонна антисанитарнай усулуобуйа тэриллибитэ билиннэ диэн үлэ, социальнай сайдыы  министиэристибэтэ иһитиннэрэр.

Бу кэһиилэр биэдэмистибэлэр икки ардыларынааҕы бэрэбиэркэ түмүгэр арылыннылар. Бу пансионат олохтоохторуттан биирдэстэрэ сөптөөх көрүүтэ-истиитэ суох сытарын устубут роликтара социальнай ситимнэргэ тарҕаммытын кэнниттэн бэрэбиэркэ ыытыллыбыта.

Сайсары оройуонугар баар чааһынай пансионакка үлэ, социальнай сайдыы миниистирин солбуйааччы Иннокентий Коротких, Дьокуускай борокуруорун көмөлөһөөччүтэ Александр Кирдяев, эрэгийиэннээҕи киһи быраабыгар боломуочуйалаах бэрэстэбиитэлэ, ону тэҥэ, анал тэрилтэлэр үлэһиттэрэ бэрэбиэркэлээтилэр.

“Ураты көрүүгэ-истиигэ, болҕомтоҕо наадыйар дьоҥҥо сөптөөх көрүү-истии суоҕа табыллыбат дьыала. Кэтээн көрөр уорганнары кытта бу тэрилтэ  кэһиилэрин барытын түргэнник суох оҥорорго дьулуһуохпут”, — диир Иннокентий Коротких.

Интэринээт дьиэтигэр олорор, ыалдьар уонна мөлтөх туруктаах олохтоохтору кинилэр сөбүлэҥнэрин ылан, мэдиссиинискэй-социальнай тэрилтэлэргэ көһөрөр туһунан быһаарыы ылылынна.

Өрөспүүбүлүкэ Үлэҕэ министиэристибэтэ «Уютный дом» чааһынай пансионат социальнай өҥөнү оҥорооччулар реестрдарыгар киирбэтэҕин, ол эрээри кырдьаҕастары көрөр-истэр ирдэбиллэр маннык тэрилтэлэртэн уһуллубаттарын бэлиэтээтэ. Итини тэҥэ, реестрга киирии пансионат бэрэбиэркэни ааспытын уонна ирдэнэр таһымҥа өҥөнү оҥорор кыахтааҕын көрдөрөр.

Министиэристибэ кырдьаҕастары чааһынай пансионаттарга олордуох иннинэ, социальнай көмүскэл уорганнарыттан сүбэ-ама ылалларыгар сүбэлиир. Быраабы кэһии эбэтэр сөбө суох көрүү-истии тахсыбыт түгэнигэр министиэристибэҕэ биллэрэргэ ыҥырар.

Бу пансионаты СӨ Борокуратуурата эмиэ бэрэбиэркэлиэҕэ. Онно социальнай хааччыйыыны сокуон өттүнэн төһө тутуһалларын, оҥоһуллар өҥө хаачыстыба өттүнэн төһө сокуоннайын, о.д.а. бэрэбиэркэлиэхтэрэ. Ол түмүгүнэн, миэрэ ылыллыаҕа.