ВЭФ-2023: Айсен Николаев «Муравьев-Амурскай – 2030: улахан соруктарга — саҥа каадырдар» сиэссийэҕэ кытынна

Илиҥҥи  экэнэмиичэскэй пуорум «Муравьев-Амурскай – 2030: улахан соруктарга — саҥа каадырдар» диэн сиэссийэтигэр  Ил Дархан Айсен Николаев компетенциялары сөптөөхтүк сыаналыырга аналлаах саҥа систиэмэни оҥорон таһаарар суолталааҕын туһунан эттэ.

— Исписэлиистэр компетенцияларыгар сөпкө сыана быһарга үөрэниэхтээхпит. Бу дойду үрдүнэн баар кыһалҕа. Син куһаҕана суохтук үлэлииллэрин көрдөрбүт систиэмэлэр бааллар, холобур “Лидеры России” куонкурус. Ол эрэн, бу да ситэтэ суох үстүрүмүөннэр. Манна биһиги бэйэбитигэр сөп түбэһэр систиэмэни оҥорон үлэҕэ киллэриэхтээхпит”, — диэтэ Айсен Николаев.
Ил Дархан «Муравьев-Амурскай – 2030” бырагыраама Уһук Илиҥҥи эрэгийиэн туспа уратыларын үөрэнэр дьоҥҥо дириҥник көрдөрөрүн бэлиэтээн эттэ: “Бу бырагыраама үлэтин эрэгийиэннэр баһылыктара өйүөх тустаахтар. Саха сирин салайааччыта быһыытынан өрөспүүбүлүкэттэн тиийбит курсаннар бэлэмнэниилэрин кэтии көрө сылдьабын. Бастакы сүүрээҥҥэ биһиги икки выпускниктаахпыт, Николай Бочков уонна Фаина Атласова кэлэн салайар үлэҕэ ананыахтара”.