ВИДЕО: Дьокуускайга халабырдьыт аһаҕастык ас-үөл пуунун халаабыт

Ыам ыйын 18 күнүгэр киэһэ 22:10 чаас саҕана полицияҕа Курашов аатынан уулуссаҕа турар ас-үөл пуунун үлэһитэ халаабыттарын туһунан тыллаабыт.

Эмсэҕэлээччи быһаарбытынан, камуфляж таҥастаах эр киһи киирэн, быһаҕынан куттаан туран, шаурма биэрэргэ модьуйбут. Повар уонна икки ыалдьыт куттанан куопуттар. Дьон суоҕунунан туһанан, халабырдьыт 1 киилэ кэриҥэ ыйааһыннаах эт уорбут. Төһө да сирэйин кистэммитин үрдүнэн, буруйдааҕы быһаарбыттар.

ИДЬМ үлэһиттэрэ буруйдаах саһан олорбут элбэх кыбартыыралаах дьиэтин булбуттар. Оперативниктар биир кыбартыыра иһиттэн 38 саастаах Өймөкөөн олохтооҕун туппуттар. «Билигин холуобунай дьыала көбүтүллүүтүн боппуруоһа быһаарыллар»,- диэн ИДьМ пресс-сулууспата иһитиннэрдэ.