Виктор Рассадин көҥүл тустууга Азия чөмпүйэнээтин үрүҥ көмүс призерунан буолла

Саха сирин көҥүл тустууга оскуолатын иитиллээччитэ Виктор Рассадин Азия чөмпүйэнээтин үрүҥ көмүс призерунан буолла. Кини 70 киилэҕэ диэри ыйааһыҥҥа Таджикистан аатыттан кытынна.

Виктор финаллааҕы киирсиигэ Киргизия бөҕөһө Эрназар Акматалиевы кытта туһунна. Манна 4:4 ахсааҥҥа бүтэһик дьайыылары оҥоруунан Акматалиев бастаата.

Виктор Рассадины ситиһиитинэн Ил Дархан Айсен Николаев телеграм-ханаалыгар эҕэрдэлээтэ: «Биир дойдулаахпытын уонна кини тириэньэрдэрин эҕэрдэлиибит! Үрдүк маастарыстыбаттан, дьулууртан уонна успуорка бэриниилээх буолууттан бу көрдөрүү кэллэ. Виктор, Саха сирэ эйигинэн киэн туттар! Ситиһиллибитинэн тохтообокко, өссө саҥа кыайыыларга дьулус!»