Владимир Путин: “Биһиги күүспүт – норуоппутугар”

РФ бэрэсидьиэнэ Владимир Путин Пятигорскай куоракка Норуоттар икки ардыларынааҕы сыһыан сэбиэтин мунньаҕын ыытта. Кини бу күннэргэ Хотугу Кавказ федеральнай уокуругар үлэлии сылдьар.

Владимир Путин бэлиэтииринэн, Арассыыйа элбэх омуктааҕынан, култууралааҕынан, үгэстээҕинэн баай. Арҕааҥҥы дойдулар национальнай боппуруоһу туруоран, дойдуга араас хамсааһыны таһаара сатыыллар.

— Билигин бары да көрө-истэ сылдьаҕыт, Арассыыйаҕа араастаан кимэн киирэ сатыыллар. Ол иһигэр биһиги дойдубут национальнай боппуруоһугар кытары. Биһиги элбэх омуктаах, араас култууралаах дойдубут. Онон киирэн, норуоту норуокка киксэрэн биэрэ, биһиги испитигэр атааннаһыыны күөртүү сатыыллар. Араас провокациялары оҥороллор. Арассыыйаны уон аҥы судаарыстыбаларга хайытыа үһүлэр. Ол тоҕото биллэр – бэйэлэрин интэриэстэригэр. Ол эрээри кинилэр алҕаһыыллар, биһиги күүспүт – биһиги элбэх норуоттаахпытыгар, духуобунаспытыгар, үгэстэрбитигэр, — диэн этэр Владимир Владимирович.

Бэрэсидьиэн билигин норуот сомоҕолоһуута хаһааҥҥытааҕар да күүскэ турбутун бэлиэтиир.

— Бу маннык уустук кэмҥэ дьон-сэргэ сомоҕолоспутун, биир буолбутун бэлиэтии көрөбүн. Тоҕотун араас экспертэртэн да, эрэгийиэн салайааччыларыттан да ыйытар наадата суох. Хас биирдии киһи билигин өйдүүр, биһиги сомоҕолостохпутуна эрэ барыны бары кыайарбытын, бииргэ буоллахпытына эрэ күүспүт өһүллүбэтин, — диэн этэр кини.

Маны таһынан мунньахха судаарыстыбаннай национальнай бэлиитикэ стратегиятын ырыттылар, Арассыыйа састаабыгар киирбит саҥа эрэгийиэннэр бу хайысхаҕа үлэлэрин кэпсэттилэр.