«Малая родина – сила России» муниципальнай пуорум түмүктэннэ

Бээтинсэҕэ, ахсынньы 12 күнүгэр, «Малая родина – сила России» III Бүтүн Арассыыйатааҕы муниципальнай пуорум «Территориальное развитие завтрашнего дня: на стыке интересов государства, предпринимательства и гражданского общества» диэн көрсүһүүнэн түмүктэннэ.

Тэрээһин икки күн устата ыытылынна, дойду 89 эрэгийиэниттэн 450 эспиэри муста.

«Сири-уоту сайыннарыы былаас, биисинэс уонна уопсастыба бииргэ дьүөрэлээн үлэлээтэхтэринэ эрэ көдьүүстээхтик олоххо киириэн сөп. Ханнык баҕарар субъект кэскилэ уонна сайдыыта кинилэр араас бырассыастарга кыттыыларыттан тутулуктаах. Холобур, Дьокуускай куорат маастар-былаана — бу категориялар бэрэстэбиитэллэрин улахан холбоһуктаах үлэтэ буолар. Эрэнэбин, үлэ түмүгүнэн нэһилиэнньэ астыныа, тоҕо диэтэххэ, бэйэтэ үлэҕэ кыттыспыта», – диэн бэлиэтээтэ РФ Бэрэсидьиэнин Ис бэлиитикэҕэ управлениетын начаалынньыгын солбуйааччы Евгений Грачев.

Пуорум икки күнүн устата дойду 89 эрэгийиэниттэн былаас, биисинэс уонна уопсастыба бэрэстэбиитэллэрэ маастар-былааннары, агломерациялары, сыыппара модеелларын, туристическай кластердары, социальнай инфраструктураны уонна да атын боппуруостары дьүүллэстилэр, бастыҥ холобурдары билиһиннэрдилэр, уопуттарын атастастылар. Пуорум 450 эспиэри түмтэ.