Владимир Путин инженердэри бэлэмнээһин туһунан кэпсэттэ

Арассыыйа бэрэсидьиэнэ Владимир Путин наука уонна үрдүкү үөрэх миниистирин Валерий Фалькову кытары көрсөн, “Инженердэр инники күөҥҥэ иһэр оскуолалара” диэн федеральнай бырайыак туһунан ыйыталаста.

Бу бырайыак 2022 сылтан үлэлиир. Ити сыл 15 эрэгийиэҥҥэ 30 оскуола аһыллан үлэҕэ киирбитэ. Күн бүгүн инженердэр оскуолалара 28 эрэгийиэҥҥэ үлэлии турар. Арассыыйа үрдүнэн барыта 50 маннык оскуола баар.

Наука уонна үрдүкү үөрэх миниистирэ Валерий Фальков бэлиэтииринэн, хас биирдии оскуола үрдүкү үөрэх систиэмэтин саҥардыыга былаһаакка буолар.

— Хас биирдии оскуола икки сүрүн соруктаах. Бастатан туран, инженердэри бэлэмнээһиҥҥэ, үөрэх систиэмэтин саҥардыыга инники күөҥҥэ иһэр былаһааккалар буолаллар. Иккиһинэн, бырамыысыланнас эйгэтигэр технологияны сайыннарыыга бу оскуолалар киллэрэр кылааттара улахан. Хас биирдии оскуола улахан хампаанньалары кытары тэҥҥэ сөҥнөһөн үлэлиир. Онон үөрэх да, практика да өттүнэн устудьуоннар баай уопуту ылаллар, — диэн этэр кини.

Маны таһынан билигин бу бырайыак оскуола оҕолорун түмэ тардан, идэҕэ уһуйууга көмө-тирэх буолуохтаах. Эрдэ Владимир Путин инженердэр оскуолалара кэнэҕэскитин науканы, үөрэҕи, бизнеһи биир ситимҥэ киллэрэн, бу эйгэҕэ каадыры бэлэмнээһиҥҥэ да, технологияны сайыннарыыга да төһүү буолуоҕун туһунан иһитиннэрбитэ.