Владимир Путин Саха сиригэр сырыыта

Бэс ыйын 18 күнүгэр Дьокуускайга Арассыыйа Бэрэсидьиэнэ Владимир Путин кэлиэҕэ. Саха сиригэр кини бастакы сырыыта 2001 сыллаахха Ленскэйгэ буолбута. Ону кытта Путин Дьокуускайга, Мииринэйгэ уонна Тиксиигэ ыалдьыттаабыта.

Бастакы сырыыта

2001 сыл алтынньы 18 күнүгэр Владимир Путин Ленскэй куоракка кэлбитэ. Кини сүрүн сыала-соруга диэн саас халаан уутуттан улаханнык эмсэҕэлээбит куораты хайдах чөлүгэр түһэрбиттэрин көрүү этэ.

Владимир Путины Саха Өрөспүүбүлүкэтин бэрэсидьиэнэ Михаил Николаев, ыксаллаах быһыы-майгы миниистирэ Сергей Шойгу уо.д.а. арыаллаан сылдьыбыттара. Бастаан дойду баһылыга Новая Мурья диэн сэлиэнньэҕэ саҥа тутуллубут оскуоланы көрбүтэ, олохтоохторго ыалдьыттаабыта. Салгыы Ленскэй куорат «Транзит» диэн саҥа оройуонугар тутуллубут элбэх кыбартыыралаах дьиэлэр олохтоохторун кытта көрсүбүтэ, «Севернэй» кыбартаалга тутуллубут спорт саалаҕа сылдьыбыта. Святитель Иннокентий аатынан таҥара дьиэтин көрбүтэ. Киэһэ бастакы нүөмэрдээх оскуолаҕа Ленскэй куораты чөлүгэр түһэриигэ тэриллибит Бырабыыталыстыба хамыыһыйатын түмүктүүр мунньаҕын ыыппыта.

Иккис сырыыта

Владимир Путин 2006 сыллаахха тохсунньу тоһуттар тымныытыттан толлубакка кэлбитэ. Ороһуоспа иннинэ, тохсунньу 6 күнүгэр. Бастаан Саха Өрөспүүбүлүкэтин бэрэсидьиэнэ Вячеслав Штырову кытта көрсүбүтэ.
Суорун Омоллоон аатынан Опера уонна балет тыйаатырыгар сылдьыбыта. Ол кэнниттэн Национальнай ойуулуур-уруһуйдуур мусуойга сылдьыбыта. Норуодунай худуоһунньук Афанасий Осипов Аҕа баһылыкка мусуойга баар хартыыналар тустарынан кэпсээбитэ. Киэһэ Преображенскайдааҕы таҥара дьиэтигэр Ороһуоспатааҕы сулууспаҕа сылдьан, Саха сирин олохтоохторун эҕэрдэлээбитэ.

Үһүс сырыыта

Үс сыл буолан баран, 2009 сыллаахха атырдьах ыйын 21 күнүгэр Владимир Путин Мииринэйгэ кэлэн барбыта. Бастаан Мииринэйдээҕи карьеры тиийэн көрбүтэ. Ол кэнниттэн сир анныгар түһэн, «Мир» алмаастаах урууданы хостуур фабрика үлэтин саҕалыыр үөрүүлээх тэрээһинигэр кыттыыны ылбыта. Ол кэнниттэн Саха сиригэр алмааһы хостооһуну салгыы сайыннарар туһунан сүбэ мунньаҕы ыыппыта.Төрдүс сырыыта 2010 сыллаахха атырдьах ыйын 28 күнүгэр Владимир Путин Тиксиигэ кэлэн түспүтэ. Бу кэлии соһуччу этэ, тоҕо диэтэргит, маҥнай Норильскайга баран испит сөмөлүөт куһаҕан күн-дьыл буолан, тустаах куоратыгар кыайан түспэтэҕэ.

Бастаан Владимир Путин «Лена-2010» Самойловскай арыыга баар күнү-дьылы кэтээн көрөр ыстаансыйаҕа сылдьыбыта. Ол кэнниттэн Егор Борисовы кытта көрсүбүтэ. Өлүөнэни туоруур күргэни тутуу, Тиксии аэродромун чөлүгэр түһэрии туһунан дьүүллэспиттэрэ.Бэһис сырыыта Владимир Путин 2014 сыллаахха Билии күнүн көрсө, балаҕан ыйын 1 күнүгэр кэлбитэ. Аан бастаан кини Хотугулуу-Илиҥҥи федеральнай университет устудьуоннарын кытта көрсүбүтэ.

Ол көрсүһүү кэмигэр кини Дарья Ефимова диэн ФЭУ аспиранткатыгар төрөөбүт күнүнэн сибэкки дьөрбөтүн бэлэхтээбитэ. Мунньахха университет инники сайдыытын торумнаабыта. Ол кэнниттэн Сэлии мусуойун кэрийэн көрбүтэ. Сэбиэдиссэй Семен Григорьев Владимир Путиҥҥа булумньулар туһунан сиһилии кэпсээбитэ. Киэһэ Владимир Владимирович “Сибиир күүһэ” гааһы хачайдыыр турба ситимин тутуу саҕаланыытыгар кэлбит Кытай Судаарыстыбаннай Сэбиэтин бэрэссэдээтэлин солбуйааччы Чжан Гаолины кытта көрсөн кэпсэппитэ. Дьокуускай куорат Үс Хатыҥ сиригэр-уотугар “Сибиир күүһэ” гааһы хачайдыыр турба ситимин тутуу саҕаланыытын сиэрэ-туома ыытыллыбыта. Владимир Путин уонна Чжан Гаоли тимир турба утаҕар илии баттаабыттара. Онон Чайыҥдатааҕы гааһы хостуур сиртэн Кытайга турба ситимин тутуу саҕаламмыта.