Владимир Путин Турция салайааччытын кытары көрсүһүөҕэ

Бу күннэргэ РФ бэрэсидьиэнэ Владимир Путин Турция салайааччытын Реджеп Тайип Эрдоганы кытары төлөпүөнүнэн кэпсэттэ. Икки дойду салайааччылара “бурдук” дуогабарын, Владимир Путин Турцияҕа сырыытын туһунан кэпсэттилэр.

РФ бэрэсидьиэнин пресс-сулууспата иһитиннэрбитинэн, Владимир Путин кэпсэтиигэ “бурдук” дуогабарын туһунан этэригэр Арассыыйа туруорсубут боппуруостара учуоттанар буоллахтарына эрэ дуогабарга төннүөҕүн туһунан бэлиэтээн эппит. Санатан эттэххэ, былырыын Арассыыйа, Украина, Турция, Холбоһуктаах Нациялар Түмсүүлэрэ Хара муоранан бурдугу, тыа хаһаайыстыбатыгар туттулар уоҕурдуулары тас дойдуларга таһыыга Стамбулга дуогабар түһэрсибиттэрэ. Бу дуогабар үстэ уһатылла сылдьыбыта, быйыл от ыйыгар Арассыыйа дуогабары тохтоппута.

Бу дуогабар кыра дохуоттаах дойдуларга көмөлөһөр сыаллаах-соруктаах түһэрсиллибитэ. Ол эрээри биир сыл иһигэр дуогабарга этиллибит бурдук уонна уоҕурдуу бэйэлэрин хааччынан олорор дойдуларга тиийбит, кыра дохуоттаах судаарыстыбаларга мантан бэрт кыра тиксибит. Ону ааһан Арассыыйа табаардара билигин да арҕааҥҥы дойдулар пуортарыгар хааллан тураллар. Онон Владимир Путин ааспыт нэдиэлэҕэ Санкт-Петербург куоракка буолбут “Арассыыйа уонна Африка” саммитыгар бу боппуруоһу болҕомто киинигэр таһаарбыта. Мунньах түмүгүнэн Турцияны уонна манна интэриэстээх атын дойдулары кытары кэпсэтии барыаҕын туһунан иһитиннэрбиттэрэ.

Реджеп Тайип Эрдоган Турцияҕа ойуур баһаарын умуруорууга Арассыыйа сөмөлүөттэрэ кэлэн көмөлөспүттэригэр Владимир Путиҥҥа уонна Арассыыйа дьонугар-сэргэтигэр дириҥ махталын биллэрдэ. Бу ыйга Турцияҕа өҥүрүк куйаас туран хас да провинцияҕа ойуур баһаара өрө турбута. Манна Арассыыйаттан Ыксаллаах быһыы-майгы министиэристибэтин “Бе-200” икки сөмөлүөтэ ойуур баһаарын умуруорууга үлэлээбитэ.

РФ бэрэсидьиэнин пресс-сулууспата икки дойду салайааччылара көрсүһүүлэрин туһунан кэпсэттилэр диэн иһитиннэрэр. Эрдэ Реджеп Тайип Эрдоган атырдьах ыйыгар Владимир Путины Турцияҕа кэлиэҕин туһунан иһитиннэрбитэ.