Владимир Путин: “Учуутал идэтигэр өссө болҕомто ууруллуохтаах”

РФ бэрэсидьиэнэ Владимир Путин бэҕэһээ, тохсунньу 24 күнүгэр, бырабыыталыстыбаны кытары мунньахтаата. Мунньахха бэрэсидьиэн быйыл Уһуйааччы сылын ыытыы, дойду иһигэр туризмы сайыннарыы боппуруостарын көрдө.

Владимир Путин 2023 сылы Уһуйааччы сылын биллэрэн турар. Сыл устата үөрэх эйгэтин үлэһиттэригэр араас хабааннаах дьаһаллар ыытыллыахтара. Ол иһигэр педагогтар уопуттарын үллэстэллэригэр анал форумнар, фестиваллар, учууталлар нэдиэлэрэ, куонкурустар буолуохтара. Ону сэргэ бүтүн Арассыыйатааҕы педагогическай диктант, уруок ыытыллара күүтүллэр. Сыл түмүгэр Арассыыйа бастыҥ учууталын талыахтара.

Мунньахха РФ үөрэҕириитин миниистирэ Сергей Кравцов иһитиннэрбитинэн, бу сылга педагогтар, учууталлар үлэлэригэр ураты болҕомто ууруллуоҕа. Билигин министиэристибэ эрэгийиэннэр бэрэстэбиитэллэрин, Судаарыстыбаннай Дуума дьокутааттарын кытары үлэлэһэн, учууталлар статустарын туһунан анал сокуон бырайыагын бэлэмнии сылдьар. Ону таһынан быйыл Арассыыйаҕа саҥа киирбит эрэгийиэннэргэ үөрэх эйгэтин сайыннарыыга болҕомто ууруллуоҕа.

Сыл чэрчитинэн араас эйгэҕэ үлэлии сылдьар уһуйааччыларга сыһыаннаах үлэлэр эмиэ барыахтара. Ол курдук, тренердэргэ, куруһуок салайааччыларыгар, о.д.а. үлэһиттэргэ анаммыт тэрээһиннэр ыытыллыахтара.

Владимир Путин бэлиэтииринэн, билигин педагог идэтигэр үөрэххэ киирии сылтан сыл элбээн иһэр.

— Бу кэлиҥҥи икки сылы кэтээн көрдөххө, педагогическэй үөрэх кыһаларыгар туттарсыы ахсаана элбээн иһэр. Уон тыһыынчанан эбилиннэ. Бу, мин санаабар, учуутал идэтэ оскуоланы бүтэрээччилэр ортолоругар улахан сэҥээриини ыларын көрдөрөр. Онон билигин ылбыт таһыммытыттан түспэккэ салгыы да бу курдук үлэлээн иһиэҕиҥ, — диэн этэр Владимир Владимирович.