Владимир Путин үгэс буолбут сыаннастарга олоҕуран иитэр үлэҕэ национальнай бырайагы оҥорорго сорудахтаата

Бу сорудах Бэрэсидьиэн дьаһалтата РФ Бырабыыталыстыбатын кытта бииргэ уонна тустаах федеральнай судаарыстыбаннай уорганнар кыттыылаах толоруллара ыйылынна диэн ТАСС иһитиннэрэр.

Бэрэсидьиэн Владимир Путин от ыйын 1 күнүгэр диэри оҕону үгэс буолбут сыаннастарга олоҕуран «личность быһыытынан дьүөрэлээн» иитиигэ национальнай бырайыагынан этиилэри бэлэмнииргэ соруйда.

Онуоха эппиэттээхтэринэн РФ Бырабыыталыстыбатын Бэрэссэдээтэлин Михаил Мишустины уонна Бэрэсидьиэн дьаһалтатын салайааччытын солбуйааччы Сергей Кириенконы анаата.

Ыччат дьыалатыгар федеральнай ааҕыныстыбаҕа ыам ыйын 1 күнүгэр диэри «үлэлии сылдьар ыччаты уопсастыбаннай-судаарыстыбаннай, ол иһигэр ыччат уопсастыбаннай холбоһуктарын иитэр-үөрэтэр үлэҕэ тардыы туһунан» соруйда.

Ону сэргэ Владимир Путин муус устар 1 күнүгэр диэри дойду бары эрэгийиэннэригэр үлэ династияларыгар анаммыт бастайааннай быыстапканы тэрийэргэ сорудахтаата.

Санатан эттэххэ, РФ Бэрэсидьиэнэ 2024 сыл олунньутугар Федеральнай Мунньахха анаабыт туһаайыытыгар хас да саҥа национальнай бырайыак туһунан кэпсээбитэ, ол иһигэр эдэр исписэлиистэри бэлэмниир «Кадрдар» уонна «Арассыыйа ыччата» бырайыактар бааллара.