Хаартыска: СИА.
Байыастарга уонна кинилэр дьиэ кэргэттэригэр көмө тиһиктээхтик оҥоһуллар. Ким даҕаны туора туран хаалбакка көмөлөһөр.
Төрөөбүт дойдуларыгар кэлбит байыастар дьоннорун-сэргэлэрин өйөбүллэринэн этэҥҥэ күннээҕи олоххо түргэнник төннөллөр диэн кэпсиир Амма улууһун дьокутаата Владимир Устинович Тимофеев:
— Биһиги Болугур нэһилиэкпититтэн түөрт уол мобилизацияланан барбыта, онтон, араас сиртэн ыҥырыллан барыта 10-н тахса уолбут байыаннай дьайыыга сылдьаллар. Билигин икки уол госпитальга эмтэнэ сытар, икки инники кирбиигэ сылдьар. Кинилэр түгэн көһүннэ даҕаны бэйэлэрэ сибээскэ тахсан кэпсэтэллэр, этэҥҥэ сылдьаллар. Дойдуларын, Сахаларын сирин сонунун, дьоннорун-сэргэлэрин туһунан ыйыталаһаллар, санаалара бөҕөх.
Биһиги улууспутугар байыастарбытын, кинилэр дьиэ кэргэттэрин өйүүр икки хамыыһыйа үлэлиир. Нэһилиэнньэ баҕа өттүнэн көмөлөһөр пуондата тэриллибитэ уонна уолаттар дьиэ кэргэттэригэр көмөлөһөр аналлаах хамыыһыйа үлэлиир.
Байыастарга уонна кинилэр дьиэ кэргэттэригэр көрүллэр араас өрүттээх көмөлөр кэмигэр бэриллэллэр. Улуус дьокутааттарын сэбиэтэ өйөбүл, көмө дьаһалларыгар барытыгар кыттабыт. Болугурум дьоно-сэргэтэ түмсүүлээх буоланнар, уолаттарбытыгар уонна кинилэр дьонноругар туох баарбытынан көмөлөһөбүт. Кыра дэриэбинэ, бары бэйэ-бэйэбитин билсэбит, кимҥэ эмэ көмө наада буолла даҕаны саба түһэн көмөлөһөбүт. Дойдуларыгар кэлбит байыастар даҕаны бааллар, олорго күннээҕи олоххо төннөллөрүгэр доҕотторо, кылааһынньыктара, үөлээннээхтэрэ, биир дойдулаахтара өйөбүл буолаллар. Мин саныахпар, уолаттар тыа сиригэр дьонноох-сэргэлээх буоланнар, ускул-тэскил барбакка, уйулҕа да өттүнэн түргэнник чөллөрүгэр түһэллэр. Оттон оҕолор сезонунан лааҕырдарга улууспутугар дуоһуйа сынньаннылар.
Хантараагынан уонна баҕа өттүлэринэн барбыт уолаттарбыт чиэстээхтик сулууспалыыллар. Байыастар туохха наадыйалларынан була охсон ыытарга кыһаллабыт. Онуоха биир дойдулаахтарбыт, тирэх пууннарга үлэлэһэ сылдьар Петр Лебедев уонна Василий Швердин көмөлөрө улахан. Биир дойдулаах уолаттарбытынан киэн туттабыт, доруобуйаны, этэҥҥэ буолууну баҕарабыт. Бу курдук, уолаттарбыт тустарынан билэ-көрө, кинилэр дьиэ кэргэттэригэр көмөлөһө олоробут.
Уолаттарбыт санаалара бөҕөҕүттэн үөрэбит, оҕолорбут, буойуттарбыт этэҥҥэ, түргэнник эргиллэн кэлэллэригэр эрэ баҕарабыт!
Дойдутааҕы МАХ мессенджергэ 75 мөлүйүөн туһанааччы бэлиэтэннэ. Платформа пресс-сулууспата иһитиннэрбитинэн, ахсынньыга сервиһи ортотунан суукка аайы…
Саҥа дьыллааҕы бырааһынньыктар иннинэ түөкүттэр былаас аатыттан сымыйа төлөбүрдэринэн уонна «бэлэхтэринэн» албынныыр ньыманы көхтөөхтүк туһанан…
Ахсынньы 20 күнүгэр Дьокуускайга «Спортивнай» түөлбэҕэ элбэх хайысхалаах успуорт саалатын үөрүүлээх аһыллыыта буолла. СӨ Ил…
Ахсынньы ыйыгар Саха сиригэр кыһыҥҥы суоллар аһыллыбыттарын үрдүнэн, улуустар икки ардыларынааҕы таксыы сыанатыгар биллэр-көстөр чэпчэтии…
СӨ Бырабыыталыстыбатын бэрэссэдээтэлин бастакы солбуйааччы Дьулустаан Борисов санаатынан, Арассыыйа Бэрэсидьиэнин пресс-кэмпириэнсийэтэ киэҥ ис хоһоонноохтук, киирбит…
СӨ Бырабыыталыстыбатын бэрэссэдээтэлин солбуйааччы Ольга Балабкина, РФ Бэрэсидьиэнин Владимир Путин улахан пресс-кэмпириэнсийэтин түмүктэрин сырдатан, судаарыстыба…