«ВОИН» киин бастыҥ курсаннарын чиэстээтэ

Олунньу 2 күнэ — Арассыыйаҕа Сталинград кыргыһыытыгар Сэбиэскэй аармыйа ньиэмэс-фашист күүстэрин үлтүрүппүт бэлиэ күнэ. Сталинград кыргыһыыта 1942 сыл от ыйын 17 күнүгэр саҕаланан баран 1943 сыл олунньу 3 күнүгэр төгүрүктээһиҥҥэ түбэспит өстөөх сэриилэрин бас бэриниилэринэн түмүктэммитэ.

Уопсайа Сталинграды көмүскээһин 200 хонук устата барбыта уонна кырыктаах хабыр хапсыһыылаах киирсиилээҕинэн устуоруйаҕа киирбитэ. Бу күн Арассыыйаҕа бойобуой албан аат күнүнэн биллэриллибитэ.

Сталинград көмүскээччилэрин хорсун быһыыларын, Дьоруойдарбыт кэриэстэрин ытыктыыр, историческай кырдьыгы харыстыыр, кэлэр көлүөнэҕэ тиэрдэр биһиги ытык иэспит. Дьокуускайга «Патриот» ыччат киинигэр Арассыыйаҕа бойобуой албан аат анаммыт күҥҥэ үөрүүлээх тэрээһин буолан ааста. «ВОИН» киин бастыҥ, ситиһиилээх иитиллээччилэригэр «Курсант – буойун» уонна «Курсант – гвардеец» бэлиэлэри тутардылар.

Үөрүүлээх тэрээһиҥҥэ Саха сиринээҕи «ВОИН» Киин филиалын дириэктэрэ Василий Егоров бастыҥтан бастыҥнарга «Курсант – буойун» уонна «Курсант – гвардеец» бэлиэлэри киэн тутта туттарда.

«Бүгүн биһиги курсаннарбытыгар шевроннары туттарабыт. Бу шевроннар судургутук бэриллибэттэр. Билиитинэн, сатабылынан, уопутунан бастыҥ, үчүгэйдик үөрэммит, үөрэх курсун үчүгэйдик ааспыт курсаннарга эрэ бэриллэр. 404076 биһиги Кыһыл аармыйабыт саллааттара Сталинград кыргыһыытыга өлбүттэрэ. Сэрии 1942 сыл от ыйын 17 күнүттэн 1943 сыл олунньу 2 күнүгэр диэри салҕаммыта. Биһиги ону толору өйдүөхтээхпит уонна билиэхтээхпит. Биһиги устуоруйаны хаһан да умнуо суохтаахпыт, устуоруйа умнуллар түгэнигэр норуот уонна судаарыстыба сүтэр. Ол иһин биһиги бу бэлиэ күҥҥэ курсаннарбытыгар шевроннары туттарабыт», — диэтэ Василий Егоров.

Ыҥырыылаах ыалдьыт быһыытынан кэлбит «Воин» ыччат байыаннай-спортивнай бэлэмнэниитин уонна патриотическай иитиитин Киинин Сахалиннааҕы филиалын дириэктэрэ Дмитрий Шевченко курсаннарга ситиһиини баҕарда.

«Бүгүн эһиэхэ бэлиэ түгэн, бу күн курсаннар олохторугар биир өйдөрүгэр-санааларыгар хатанан хаалар түгэн буолар. Курсаннары эҕэрдэлиибин, бу сыралаах дьарыккытыгар уонна ыарахан үлэҕитигэр, саҕалааһыннаргытыгар, сатабылгытыгар, тулуургутугар уонна олоххо ситиһиилэри баҕарыам этэ. Бу инники өттүгэр барыта эһиги өссө сатабыллаах, күүстээх уонна бөҕө буоларгытыгар көмөлөһүөҕэ. Салгыы эһигини кытары күрэхтэһиилэргэ көрсүөхпүт, онно ким күүстээх – ол кыайыаҕа», — диэтэ Дмитрий Шевченко.

«Курсант – буойун» бэлиэни уопсай сайыннарыы бырагыраамаларын ситиһиилээхтик толорбут курсаннарга – Элиза Агаповаҕа, Анастасия Копытцеваҕа, Максим Макитовка туттарылынна.  Бу тэрээһин чэрчитинэн үөрэхтэригэр уонна успуорт күрэхтэригэр ураты ситиһиилэри көрдөрбүт Александр Варвариковка, Маргарита Герасимоваҕа, Мирлан Дьяконовка, Артем Степановка, Владимир Христофоровка «Курсант – гвардеец» бэлиэлэр туттарылыннылар.

Наҕараадаламмыт курсаннар хас биирдиилэрэ «Аҕа дойдубар уонна норуотпар бэриниилээхпин!» диэн этэн доргуттулар, онуоха саалаҕа мустубут курсаннар бары «Ураа! Ураа! Ураа!» диэн тэбис-тэҥҥэ хардаран, киэн туттуу уонна сомоҕолоһуу тыынын үөскэттилэр.