II Наахара нэһилиэгэр “Ворошиловский стрелок” күрэхтэһии буолан ааста

Ньукуолун күнүгэр Мэҥэ Хаҥалас II Наахара нэһилиэгэр самаан сайын кэлиитин уруйдаан көрсүбүттэр. Бу туһунан нэһилиэк олохтоохторо иһитиннэрдилэр.

Бу дьоро күн Аҕа дойду Улуу сэриитин кыттыылааҕа, стрелковай полка стрелога Иппатий Иванович Ермолаев аатынан  “Ворошиловский стрелок” күрэхтэһии буолан, кэлбит дьон сэҥээриитин ылла. Күрэхтэһиигэ барыта 9 эр киһи кыттан, биэс түһүмэххэ күөн көрсүспүт.

Биэс көрүҥ түмүгүнэн муҥутуур кыайыылааҕынан 17 очколаах Андрей Гаврильев, 19 очколаах Семен Васильев — иккис миэстэ, 20 очколаах Руслан Никаноров — үһүс буоланнар, Иппатий Иванович оҕолоро, сиэннэрэ, хос сиэннэрэ олохтообут сыаналаах бириистэрин туттулар.

Ол курдук, Андрей Гаврильевка — 20000 ,Семен Васильевка — 15000, Руслан Никаноровка  — 10000 солк. суумалаах сэртипикээттэри үөрүүлээх быһыыга-майгыга, ытыс тыаһынан арыаллаан туттарбыттар.

Салгыы салгын саатынан биирдиилээн сыал ытыытыгар күрэхтэһии интэриэһи тардыбыт. Күрэхтэһиигэ  барыта 24 киһи кыттыбыт. Манна 17 очкону хомуйбут Николай Куприянов бастаан, Иппатий  Ермолаев оҕолоро туруорбут эрэһиинэ тыыларын хаһаайынынан буолбут. Бу күн Ньукуолун күнүнэн олохтоох дьаһалта, кулууп үлэһиттэрэ кус миинин буһаран, биир дойдулаахтарын күндүлээбиттэр. Онон иккис Наахара олохтоохторо аҕаларын, эһээлэрин сырдык аатын үрдүктүк тутан, биир дойдулаахтарыгар бириистэри бэлэхтээбит Ермолаевтарга тэрийээччилэр ааттарыттан ис сүрэхтэн махтаннылар.