Үбүлүөйдээх, умнуллубат түһүлгэ

Бэҕэһээ «Саталга» номнуо бэһис төгүлүн көтөр мээчиги таптааччылар волейболга турнирдара буолан ааста.

Быйылгы балаһыанньанан, сайын устата киэһээҥҥи дьарыктарга сылдьыбыт дьону, 4 тэҥ хамаандаҕа арааран, күн устата олус эрийсиилээх, тыҥааһыннаах киирсиилэр буоллулар.

Сыл аайы кыттааччы ахсаана элбээн иһэрин, волейбол курдук маассабай спорт көрүҥэ үгүс дьон интэриэһин тардарын бэлиэтиир наадалаах.
Былырыын «Саталга» волейбол площадката оҥоһуллан киириитигэр волейболистар хас биирдиибит кыттыгастаах буоламмыт, площадка территорията сыл аайы тупсарыгар, куруук ыраас буоларыгар кыһаллабыт. Онон киэһээҥҥи дьарыктар иннилэринэ, хайаан да ыһыллыбыт бөҕү хомуйан эрэ баран, оонньуу киирэбит.

Быйылгы күрэхпит түмүгүнэн, Уйбаан Сэмэнэп капитаннаах «Чыпчаал» хамаанда оонньооччулара кыайыы өрөгөйүн билэн, кыһыл көмүс мэтээли түөстэригэр кэтэн дьоллоннулар. «Тундра» маҕаһыын (ИП Макаров Н. К.) олохтообут термостарынан наҕараадаланнылар.

Иккис миэстэҕэ Сардана Жерготова «Сулус» хамаандата таҕыста. Кинилэр «Айта+М» (ИП Матахова А. И.) олохтообут набордарын туттулар.
Үһүс бириистээх миэстэҕэ, Саха гимназиятын кэскиллээх үөрэнээччитэ Айтал Жерготов «Чаҕылхан» хамаандата тахсан, ИП Ситников Н. И. «Йо-хо-хо» маҕаһыынтан 15 000 сууммалаах сертификат хаһаайыттарынан буоллулар. Төрдүс миэстэни Дмитрий Тимофеев капитаннаах «Дьулуур» хамаанда ылла уонна бэйэбит уолбут, Дьааҥыттан төрүттээх Василий Слепцов олохтообут «Рыбалка у Васи» сертификаты тутта.
Итини таһынан, 12 номинация олохтонно. «Лучший разыгрывающий» Сардана Жерготова, Спиридон Тимофеев, «Лучший защитник» Ольга Степанова, Илья Оконешников, «Лучший нападающий» Раиса Прудецкая, Евгений Степанов, «Полезный игрок» Александр Семенов, Айыына Жерготова, «Перспективный игрок» Арылхан Федоров, «Тренировка без перерыва» Уйбаан Семенов ааттанна. Кыттааччылар куоластааһыннарынан «Көрөөччүлэр биһирэбиллэрэ» ааты Айтал Жерготов, «Душа компании» Екатерина Бястинова ыллылар. Номинация хаһаайыттара бары сыаналаах бэлэхтэри,сорохтор харчынан бириистэри туттулар.

«Саталга» быйылгы бэһис үбүлүөйдээх күрэхтэһии үрдүк таһымнаахтык ыытылларыгар харчынан, бирииһинэн күүс-көмө буолбут бука бары олохтоох маҕаһыыннарбыт салайааччыларыгар, ону таһынан «Артезия» аквавода тэрилтэ салайааччытыгар Габышев В. М.,»Кустук» маҕаһыын хаһаайыныгар Андросов А. В., «Автобаза» автосервис хаһаайына Нам Үөдэйин ыччата Новгородов П. П., бэйэбит бииргэ оонньуур табаарыстарбытыгар Александр Намыҥҥа, Евгений Жерготовка, Айсен Жерготовка Рая Прудецкаяҕа, Тимофей Левиҥҥа, Дмитрий Тимофеевка, Спиридон Тимофеевка тэрийээччилэр ааттарыттан улахан махталбытын биллэрэбит. Инникитин да, хардарыта көмөлөсүһэ, биир санаанан, биир сүбэнэн күрэхтэһиибит таһымын үрдэтэн иһиэхпит диэн эрэллээхпит.

Күрэхтэһиибит сүрүн судьуйатынан, Намҥа ыытыллыбыт улахан тэрээһинин быыһыгар бириэмэ булан, сүбэлээн-амалаан, СР волейболга Федерациятын Президиумун чилиэнэ, Саталга олохтоох Айсен Жерготов үлэлээтэ. «Сахабэчээт» волейбол кулуубун бэтэрээн оонньооччута Любовь Поповаҕа, Марха 2-с ньүөмэрдээх орто оскуолатын физкультураҕа учуутала Наталья Обламскаяҕа ыҥырыыбын ылынан, күрэхтэһиибит судьуйаларынан буолбуккутугар, дьүөгэлэрбэр махтанабын.

Дьэ, ити курдук атырдьах ыйын биир күнүн биһиги олус туһалаахтык, умнуллубаттык, сэргэхтик атаардыбыт. Күрэхтэһиибит Бүтүн Россиятааҕы физкультурник күнүгэр сөп түбэспитэ, тэрээһиммит суолтатын өссө күүһүрдэн биэрдэ.

Бука бары кыттааччыларга, спонсордарга баҕарабын эйэлээх олоҕу, күөх халлааны, чэгиэн туругу!

Күрэхтэһии сүрүн тэрийээччитэ

Екатерина Бястинова.