Горнай улууһугар Ыччат десана үлэлээтэ

Бу күннэргэ Ыччат десана «За нас! За победу!» девизтээх Горнай улууһугар тиийэн үлэлээтэ. 110 эдэр, эрчимнээх устудьуон ыччат Маҥыраска, Дьиикимдэҕэ, Бэрдьигэстээххэ, Аһымаҕа, Бэс-Күөлүгэр, Орто-Суртка тиийэн субуотунньуктаата.  Ыччаттар мас саһааннаатылар, бөх-сыыс хомуйдулар, тастылар, тэпэлииссэ өрөмүөннээтилэр, уо.д.а үлэлэри толордулар. Ол туһунан Горнай улууһун дьаһалтатын пресс-сулууспата иһитиннэрэр.

Ыччат десана ааспыт кыһыны быһа улуустары кэрийэн олохтоохторго, байыаннай эпэрээссийэҕэ сылдьар байыаннай сулууспалаахтар дьиэ кэргэттэригэр көмөлөспүттэрэ, өрөспүүбүлүкэ граннарыгар кыттарга нэһилиэнньэҕэ сүбэ-ама биэрбиттэрэ уонна оҕону, ыччаты патриотическай иитиигэ аналлаах тэрээһиннэри ыыппыттара.

Горнай улууһугар десант кыттыылаахтара аҕа саастаахтарга, бэтэрээннэргэ, байыаннай дьайыыга кытта сылдьар дьон дьиэ кэргэттэригэр, социальнай көмөҕө наадыйааччыларга көмөлөстүлэр.

ХИФУ иһинэн баар «ОССО», «ДНД», “ZEMA” түмсүүлэр ыччаттара итини сэргэ 9-11 кылаас үөрэнээччилэригэр идэҕэ туһулуур үлэлэри ыыттылар, кэнсиэр көрдөрөн дьону-сэргэни сэргэхситтилэр.