Үөһээ Бүлүүгэ төрөөбүт төрүт тылы-өһү сайыннарыыга улахан сугулаан

Бүгүн, кулун тутар 18 күнүгэр, Үөһээ Бүлүү улууһугар Д.С. Спиридонов аатынан Үөһээ Бүлүүтээҕи гимназияҕа «Туругура, тупса тур, сарыал санаа – сахам тыла!” улуус олохтоохторун сугулаана саҕаланна. Сугулааҥҥа Бүлүү бөлөх улуустарыттан уонна Горнай улууһуттан араас идэлээх дьон, оҕону сахалыы эйгэҕэ иитии, төрөөбүт төрүт тылы-өһү сайыннарыы тула санааларын атастастылар, бырайыактарын дьүүллэстилэр.

Тэрээһиҥҥэ өрөспүүбүлүкэ лиссиэй-интэринээтин дириэктэрэ, физика-математика билимин дуоктара Иван Иванович Шамаев, ХИФУ педагогика уонна психология кафедратын доцена педагогика билимин хандьыдаата Татьяна Ивановна Никифорова, ХИФУ оскуола иннинээҕи саастаах оҕону үөрэхтээһин кафедратын доцена, педагогика билимин хандьыдаата Людмила Витальевна Попова, «Радуга» чөлүгэр түһэрэр киин үлэһитэ, Мэдисиинэ билимин хандьыдаата Гульнара Ивановна Софронова, Ил Дархан тылы сайыннарар сүбэтин, Саха Өрөспүүбүлүкэтин Бырабыыталыстыбатын Тиэрмин хамыыһыйатын кыттыылааҕа, мэдисиинэ билимин хандьыдаата Николай Николаевич Павлов-Халан, Мэҥэ Хаҥалас улууһун үөрэҕин салалтатын сүрүн исписэлииһэ Татьяна Михайловна Дмитриева, Бүлүү куораттан Саха сиринээҕи норуот педагогикатын ассоциациятын бэрэссэдээтэлэ Еремей Константинович Чиряев, Сунтаар улууһун «Күөрэгэй» эдэр ийэлэр хамсааһыннарын түмээччитэ, Сунтаар 2 нүөмэрдээх орто оскуолатын саха тылын учуутала Сардана Афанасьевна Афанасьева, Горнай улууһун С.Г. Ковров аатынан Күөрэлээх орто оскуолатын саха тылын учуутала Омолло Афанасьевна Слепцова, Дьокуускай куорат «Ситим» кукла тыйаатырын салайааччыта Зоя Ивановна Яковлева, нэһилиэк баһылыктара, дэлэгээссийэлэрэ, саха тылын учууталлара кытыннылар.

Тэрээһин Трофим Васильевич Миронов алгыһынан аһылынна. Ол кэнниттэн Валентина Семенова салайыытынан дьарыктанар Д.С.Спиридонов аатынан Үөһээ Бүлүү гимназиятын үөрэнээччилэрэ олоҥхоттон быһа тардыыны толордулар.

Сугулааҥҥа кэлбит ыалдьыттар тыл этиилэрин быыһыгар Марта Силигиянова салайааччылаах Ю.Н.Прокопьев аатынан Үөһээ Бүлүү орто оскуолатын үөрэнээччилэрэ «Айхал сахам тылыгар!» П.Н. Тобуруокап поэматын аахтылар.

Салгыы тэрээһин сүрүн мунньаҕар Үөһээ Бүлүү улууһун үөрэҕин салаатын начальнига Юрий Кынатов “Үөһээ Бүлүүгэ саха тылын үөрэтии туругун”, мэдисиинэ билимин хандьыдаата, невролог быраас, Гульнара Софронова “Ийэ тылынан иитии — оҕо мэйиитин үлэтигэр сабыдыалын”, Үөһээ Бүлүү улууһун Ийэ тыл сүбэтин Дьаһабылын чилиэнэ Гульнара Харитонова “Улуус уһуйаанын оҕотун сахалыы саҥарар, өйдүүр таһымын чинчийии түмүгүн”, Үөһээ Бүлүү улууһун Ийэ тыл түмсүүтүн салайааччыта Варвара Васильева “Улуус оскуолаҕа үөрэнэр оҕотун сахалыы саҥарар таһымын чинчийии 2023, 2025 сс. тэҥнии тутан ырытыы”,  Үөһээ Бүлүү улууһун Ийэ тыл Дьаһабылын салайааччыта Бурхалей Макаров “2023 сыллаахха ыытыллыбыт “Омук күүһэ өйүгэр — өйүн күүһэ тылыгар” диэн улуус сугулаанын уураҕын туолуутун”,  Төрдүс оскуола төрөппүтүн кэмитиэтин салайааччыта Хотууна Яковлева “Нам улууһугар ыытыллыбыт төрөппүт сугулаанын” туһунан дакылааттары оҥордулар.

Күн иккис аҥарыгар Аал Луук Мас саалатыгар хас даҕаны түһүлгэнэн киэһэ хойукка диэри үлэлииллэрэ былааннанар. «Тыа сирин бүгүҥҥү кыһалҕата: төрөөбүт тыл”, “Оҕо саҥарар, толкуйдуур дьоҕурун сайыннарыы”, “Патриотическай иитиигэ”, “Куукула тыйаатыра ийэ тыл сайдарын кэскилэ, “Ийэбиниин сахалыы ааҕабыт”, о.д.а. тиэмэлэргэ семинардар, маастар кылаастар ыытыллыахтара.

“Ийэ тылбытын хараанныыбыт!” диэн нэһилиэктэр бырайыактарын көмүскээтилэр. Саалаҕа  “Уһуйаан ийэ тылга уһуйар” улуус уһуйааннарын быыстапката турда.

Тэрээһин чэрчитинэн быыстапка, бырайыак, төрөөбүт тылы сайыннарыыга ыытыллыбыт тэрээһиннэр түһүлгэлэрин салайааччылара түмүгү таһаарыахтара, уураахха эбии этиилэри киллэриэхтэрэ. Оттон сугулаан түмүктүүр  түһүмэҕинэн Тыл Сүбэтин, Дьаһабылын талыахтара, түмүк уурааҕы ылыныахтара.