Үөдүгэй нэһилиэгэр түргэнник ситэр салаанан дьарыктанар дьон ахсаана сыллата эбиллэр. Бүгүн өр сылларга дьиэ көтөрүн арааһын хото иитэн кэлбит уопуттаах нэһилиэк олохтоохторо Маргарита Николаева, Марианна Евдокимова, Раиса Павлова, Владимир Филиппов улуус олохтоохторугар анаан Үөдүгэй дьаһалтатын тыа хаһаайыстыбатын исписэлииһэ Нина Семенова уонна олохтоох бибилэтиэкэ көҕүлээһиннэринэн маастар-кылаас ыыттылар.
Куурусса араас боруодатын таһынан куһу-хааһы, сүүрбэ киилэҕэ тиийэ үктүүр индюгу хайдах табыгастаахтык иитиэххэ сөбүн кэпсээтилэр. Кинилэр хас биирдиилэрэ бу салааҕа тус туһунан көрүүлээхтэр-истиилээхтэр эбит. Холобура, Маргарита Николаева 80-ча кууруссаны сылы эргиччи иитэр эбит. Сүрүннээн сымыыттыыр кууруссалары иитэр. Марианна Евдокимова сүүрбэччэ киилэҕэ тиийэр индюгу уонна перепелкалары, эт боруодата кууруссалары иитэр. Бэйэтэ ииппит хаачыстыбалаах, сибиэһэй этинэн сыл устата чугас дьонун аһатар. Раиса Николаева сүрүн болҕомтотун сымыыт арааһын инкубаторынан таһааран нэһилиэнньэни хааччыйар. Ити сымыыттарын Канадаттан, Чехияттан, Румынияттан суруттаран ылар. Бүөбэйдээн, көрөн-истэн таһааран чоппуускалары, хаастары, индюктары атыылыыр.Сымыыттыыр уонна эт (бройлер) кууруссаны иитэр.Раиса, Владимир Филипповтар Бүлүүттэн хаас оҕолорун ылан иитэллэр. Сыдыбылтан индюк сымыытын аҕалан инкубатордаан таһаараллар эбит. Бөтүүгү анаан-минээн эккэ диэн иитэллэр уонна кыһыҥҥы кэмҥэ ыалдьар, диеталаах, операцияны ааспыт дьоҥҥо анаан атыылыыллар эбит. Араас боруода кууруссаларын сымыытын күннэтэ сибиэһэйдии нэһилиэнньэҕэ атыылыыллар. Дьон маҕаһыын сымыытын буолбакка, кинилэр сымыыттарын сөбүлээн атыылаһаллар. Кинилэр атыыга кэлбит көтөр этин (окорочканы) атыыласпаттар. Сылы эргиччи бэйэлэрин сибиэһэй көтөрдөрүн этинэн дьиэ кэргэттэрин, аймахтарын хааччыйаллар.
Кинилэр дьиэ көтөрүн аһатыыга улахан болҕомтону ууруу наадатын туһунан кэпсээтилэр. Комбикорму таһынан куруппа арааһын, оҕуруот аһын, балыгы, эти буһаран сиэтэллэрин, обрат, от эбии биэрэллэрин туһунан эттилэр. Бүгүҥҥү көрсүһүүгэ улууспут олохтоохторо барыта 21 киһи кэлэн кыттыыны ыллылар. Олус интэриэһиргээн иһиттилэр. Дьиэ көтөрүн иитиигэ үгүс боппуруоһу биэрдилэр.
Бу маастар-кылааска Владимир Филиппов экзотическай ийэ уонна эдэр кууруссалар сымыыттарын биир ячейканы ким баатаахха оонньотто. Сымыыт бибилэтиэкэ үлэһитэ Валентина Филипповаҕа тигистэ. Маргарита Николаева боруода кууруссаларын араас өҥнөөх сымыыттарын атыылаата.
Кэлбит дьон бары саҥа былааннардаах, дьиэ көтөрүн ииттэр баҕалаах тарҕастылар.Олус туһалаах маастар-кылаас буолла диэн махталларын эттилэр.
Валентина ФИЛИППОВА
Профилактическай тэрээһиннэр холбоһуктаах дьаһалларын кэмигэр Өлүөхүмэ оройуонугар ИДьМ учаастактааҕы боломуочунайдара уонна ИДьМ подразделениеларын үлэһиттэрэ арыгы…
Бүгүн, кулун тутар 14 күнүгэр, СӨ Тас сибээстэргэ уонна норуоттар дьыалаларыгар министиэристибэтин кэллиэгийэтин Саха сирин…
ИДьМ 2 №-дээх полициятын дьуһуурунай чааһыгар суотабай төлөпүөнү уорбуттарын туһунан эр киһи сайабылыанньа суруйбут. Эр…
Саха сиригэр анал байыаннай дьайыы кыттыылаахтарын дьоруойдуу быһыыларын үйэтитэр сыаллаах мемориальнай комплекс бырайыагын оҥорууга архитектурнай…
2025 сыл саҕаланыаҕыттан Саха сириттэн 50 массыынаны анал байыаннай дьайыыга тиэртилэр. Тиэхиникэни кытта байыастарга чугас…
Кулун тутар 20 күнүгэр Дьокуускайга «Үлэ кыбаартала» креативнай кластерга «Туристический код моего района» куонкурус финала…