Үөһээ бүлүүлэр байыаннай дьайыы кыттыылаахтарыгар 22 мөл. солк. хомуйбуттар

Үөһээ Бүлүү улууһугар 2025 сылга байыаннай дьайыы кыттыылаахтарыгар уонна кинилэр дьиэ кэргэттэригэр көмө оҥоруу бүттүүн норуот дьыалата буолла.

Улуус баһылыга Валерий Николаев кэпсээбитинэн, өйөбүлгэ наадыйар хас биирдии ыалы хабаары үлэ систиэмэлээхтик оҥоһулунна, мас бэлэмнээһиниттэн саҕалаан эмтэниини тэрийиигэ тиийэ уонна олох-дьаһах боппуруостарыгар көмөлөстүлэр.

Ураты киэн туттуунан үс бөдөҥ гуманитарнай миссия ыытылынна. Улуус бэрэстэбиитэллэрэ 163 байыаһы кытта сирэй көрсөн биэс туонна кэриҥэ таһаҕаһы уонна 300-тэн тахса тус баһыылканы тиэрдээри тыһыынчанан тахса километры айаннаатылар. Инники кирбиигэ саамай наадалааҕы – квадрокоптертан, матасыыкылтан уонна тепловизортан саҕалаан рацияларга, дрону утары сааларга, сылаас таҥаска уонна саха аһыгар-үөлүгэр тиийэ хомуйан ыыттылар. Олохтоохтор үбүнэн кыттыылара эмиэ сөхтөрөр – өйөбүл пуондатыгар 22 мөлүйүөн кэриҥэ солкуобай хомулунна.