Тааттатааҕы үөрэҕирии салаатын начаалынньыга Владимир Кривошапкин оскуола оҕотун ууттан быыһаан, хорсун быһыыны оҥордо. Быһылаан Таатта үрэххэ паарка таһыгар муоста аннынан аҕыйах хонуктааҕыта тахса сыста.
Арай, Владимир Владимирович оҕолор тустарыгар дууһата ыалдьыбат, оҕону көрбөтөх буоллун, бу уолчаан дьылҕата хайдах буолуо эбитэ буолла?..
Хорсун быһыыны көрдөрбүт Владимир Владимировичтан туох, хайдах этэй диэн туоһуластыбыт. Онуоха кини кэпсиир:
— Пааркаҕа ыытыллыбыт улуус үөрэнээччилэригэр аналлаах чэпчэки атлетика спартакиадатын түмүктээн, наҕараадалааһын кэннэ 3 чаас саҕана оҕолор, учууталлар хомунан айаннаатыбыт. Мин массыынабар олорон, суолбар оҕолор баалларын иһин, аа-дьуо айаннаан истэхпинэ муоста таһыгар икки сыгынньах уол сөтүөлүү киирэн эрэр диэммин, «Сөтүө бобуулаах, тоҕо ууга киирдигит?” диэн хаһыытаабыппар, уолаттар уу диэки ыйа-ыйа: «Ол, ол”, — дииллэр. Массыынабыттан тахсан ыйбыт сирдэрин көрбүтүм биир оҕо ууга төбөтө көстө-көстө сүтэрэ. Уһуну-киэҥи толкуйдаабакка ырбаахыбын уста биэрээт, ууга ыстанным. Уу кэлэ турар буолан, үрэх сүүрүгэ сүрдээх этэ, уолум хайдах эрэ уу анныгар эрэ барбатар диэн толкуйдуубун. Харбаан тиийиэхпэр диэри уолум тулуктаһара буоллар, уу анныгар барда да баттаһа харбыам суоҕа дии санаан баран, хата уолум үөһэ тахсаатын кытта баттаҕыттан харбаан ылан, тиэрэ тардан, чычаас сир диэки үттүм. Утары уолаттара кэлэн көмөлөһөн таһаардыбыт. Уолбут уу дэлби испитин хачайдаатыбыт, саҥарар этэ.
Улууска сааскы халаан уута кутталы үөскэтэринэн ыксаллаах быһыы-майгы эрэсиимэ биллэриллибитэ. Бу дьаһалынан үөрэх салаатыгар элбэх бирикээс, дьаһал тахсыбыта. Манан да сылыктаатахха, нэһилиэк олохтоохторо бары истэ-билэ сылдьан, бу оҕолор сөтүөлүү киирбиттэрин ааһан иһэр массыыналар суоппардара да, дьон да аахыйбатаҕын сөхтүм. Онон өссө биирдэ этиэм этэ: төрөппүттэр, нэһилиэк олохтоохторо, ханна да буоллун сэрэххитин сүтэримэҥ. Оҕолоргутун, сиэннэргитин хараххыт далыттан сүтэрбэккэ, кэтии-маныы сылдьыҥ”.
Биһиги ортобутугар маннык хорсун санаалаах дьон баалларыттан киһи үөрэр.
Елена СЛЕПЦОВА
Ил Түмэҥҥэ “Оҕо туризмын, сынньалаҥын, доруобуйатын бөҕөргөтүү аныгы туруга уонна сайдыыта” диэн ааттаах “төгүрүк остуол”…
Байыаннай сулууспаҕа талыы кэлим киинигэр хантарааҕынан сулууспалыы барыан баҕалаах дьон доруобуйатын туругун бэрэбиэркэлээһин үлэтэ тупсарыллар.…
Өлүөнэ өрүскэ муус Кангаласс бөһүөлэгин аттынан хамсаата уонна Нам улууһун сиригэр-уотугар чугаһаан эрэр диэн Гражданскай…
Ыксаллаах быһыыны-майгыны сэрэтэр, туоратар хамыыһыйа мунньаҕын түмүгүнэн, вице-премьер Дмитрий Садовников Халыма өрүскэ уу таһыма үрдээн…
Волгоград анныгар Саха сириттэн буойун уҥуоҕун уонна сэдэх түөскэ кэтиллэр бэлиэни буллулар. Волгоградскай уобалас Городищенскай…
Бу күннэргэ Ил Түмэн көрүүтүгэр киирбит сокуон барылынан Саха Өрөспүүбүлүкэтин Административнай буруйу оҥоруу туһунан Кодексатыгар…