Үөрэх төлөбүрүгэр – 50 тыһыынча солкуобай

Быйыл балаҕан ыйын 1 күнүттэн элбэх оҕолоох дьиэ кэргэттэр оҕолоро орто анал үөрэх кыһатыгар киирэн, аныгы олоххо наадалаах идэлэргэ төлөбүрдээх үөрэххэ үөрэнэр буоллахтарына, 50 тыһыынча солкуобайдаах көмөнү ылыахтарын сөп. Икки оҕо орто үөрэххэ төлөөн үөрэнэр буоллахтарына, төлөбүр иккиэннэригэр бэриллэр.

Бу көмө СӨ бырабыыталыстыбатын 2024 сыл от ыйын 25 күнүнээҕи 322 №-дээх уурааҕын чэрчитинэн, оҥоһуллар.

Туох ирдэбиллээҕий?

– устудьуон Саха сиригэр олорор, элбэх оҕолоох дьиэ кэргэҥҥэ төрөөбүт, улааппыт буолуохтаах (дьиэ кэргэн дохуота аахсыллыбат);

– орто анал үөрэх кыһата хайаан да Саха сиригэр баар буолуохтаах диэн ирдэбил турбат, ол эрээри, булгуччу лиссиэнсийэлээх буолуохтаах;

– үөрэнии төлөбүрдээх;

– идэтэ үлэ ырыынагар кэскиллээх диэн билиниллибит буолуохтаах (испии­һэги көр).

Төлөбүрү хайдах ылыахха сөбүй?

1. Төлөбүрдээх үөрэх дуогабарыгар илии баттыыгыт.
2. Дуогабар усулуобуйатынан, үөрэҕи төлүүгүт.
3. Докумуоннары бэлэмниигит:

— дуогабар  куоппуйата;

— төлөөбүт туһунан докумуоннар;

— оҕо төрөөбүтүн туһунан сибидиэ­тэлистибэтэ.

4. Социальнай управление нөҥүө сайабылыанньа бэриллэр (эбэтэр Элбэх өҥөнү оҥорор киин, “Госуслуги” портал нөҥүө).
5. 10 үлэ күнүн устата быһаарыыны кэтэһэҕит. Ол кэнниттэн харчы түһэр.

Сайабылыанньаны устудьуон 18 сааһын туолбут буоллаҕына, бэйэтэ суруйар. 18 сааһын туола илик буоллаҕына, төрөппүтэ суруйар.