ЫЙЫТ-ХОРУЙДУУБУТ: Быйыл сылгыга субсидия көрүллэр дуо?

«Быйыл сылгы иитиитинэн дьарыктанар дьоҥҥо субсидия көрүллэр дуо?» диэн ыйытыы Таатта улууһуттан киирдэ. СӨ Тыа хаһаайыстыбатыгар министиэристибэтэ туһааннаах ыйытыыга маннык хоруйу биэрдэ:

— Бу 2025 сыл тохсунньу 1  күнүттэн тыа хаһаайыстыбатын өйөөһүҥҥэ олохтоох бэйэни салайыныы уорганнарын боломуочуйата кэҥээтэ. Ол курдук, бородууксуйаны оҥорон таһаарыыга, 100 төбө иһинэн сүөһүгэ анаммыт хотону, сайылыгы, сылгы баазатын, 200 туоннаҕа диэри бурдугу уонна оҕуруот аһын харайар хранилищелары, үүт-арыы сыахтарын, буойуналары тутууга үп-харчы көрүлүннэ. Барыта 14 хайысхаҕа көмө оҥоһуллар:

— тус хаһаайыстыбаҕа ынах-сүөһүнү иитиигэ;

— ынах-сүөһү иитиитин сайыннарыыга;

— сибиинньэ иитиитин сайыннарыыга;

— сылгыны үөрдээн иитиигэ;

— дьиэ табатын иитиигэ, үксэтиигэ;

— оҕуруот аһын үүннэриигэ;

— хортуоппуйу үүннэриигэ;

— туорахтаах бурдугу үүннэриигэ;

— үүт аһы дэлэтиигэ, оҥорон таһаарыыга;

— ынах-сүөһү этин бородууксуйатын дэлэтиигэ, оҥорон таһаарыыга;

— сылгы этин бородууксуйатын дэлэтиигэ, оҥорон таһаарыыга;

— хортуоппуйу үүннэрии, оҥорон таһаарыы;

— оҕуруот аһыттан бородууксуйа оҥорон таһаарыы;

— туорахтаах бурдугу оҥорон таһаарыыга.

Ол курдук, судаарыстыба өйөбүлүн саҥа ньыматын  хас биирдии улуус сайыннарыахтаах, кэҥэтиэхтээх хайысхаларын бэйэтэ быһаарар, олоххо киллэрэр бэрээдэктэри ылынар, ыстаапкаларын быһар уонна тиийбит үбү табатык туһаныахтаах. Сүрүнэ — тыа хаһаайыстыбатын сайдыыта, оҥорон таһаарыытын кэҥээһинэ буолар. Оччотугар бэйэ оҥорон таһаарар бородууксуйата дэлэйиэхтээх, дьон-сэргэ тыа сиригэр талаһыыта күүһүрүөхтээх. Үп-харчы хаамыыта, ону хонтуруоллааһын барыта электроннай бүддьүөт нөҥүө барар. Министиэристибэ отчуоту көрөр. өскөтүн, улуустарга бэриллибит үбү сөпкө дьаһайан туттубат түгэннэригэр, эһиилги сылга көрүллэр көмө кээмэйэ аҕыйыан сөп.

Бу туһунан СӨ тыа хаһаайыстыбатыгар министиэристибэтин пресс-сулууспата иһитиннэрдэ.