Хаартыска: СИА.
Кулун тутар 5 күнүгэр Саха сирин үлэһит дьахталларын пуорума буолла. Манна бары улуустартан 200-тэн тахса кыттааччы — идэлээх сойуустар актыбыыстара, көхтөөх уопсастыбанньыктар кытыннылар.
Ыҥырыылаах ыалдьытынан Москваттан Арассыыйа тутулуга суох идэлээх сойуустарын федерацияларын (ФНПР) бэрэссэдээтэлин солбуйааччы Александр Шершуков кэлэн, үлэлии сылдьар.
Күн бастакы аҥаарыгар пленарнай чааска дакылааттары иһиттилэр. Ол курдук, СӨ идэлээх сойуустарын федерациятын бэрэссэдээтэлэ Николай Дегтярев, СӨ бырабыыталыстыбатын бэрэссэдээтэлин солбуйааччы Георгий Степанов, Ил Түмэн социальнай бэлиитикэҕэ, үлэҕэ, дьарыктаах буолууга бастайааннай кэмитиэтин бэрэссэдээтэлэ Алена Атласова, доруобуйа харыстабылын миниистирин солбуйааччы Любовь Бурнашева, үлэ, социальнай сайдыы миниистирин солбуйааччы Елена Теплякова, Дьарыктаах буолуу кэмитиэтин бэрэссэдээтэлэ Светлана Горюшинская, уо.д.а. дакылаат аахтылар.
Сүрүннээн, үлэһит дьахталлар бырааптарын көмүскээһин, дьарыктаах буолуу, дьиэ кэргэн, демографическай балаһыанньа, дьахталлар доруобуйаларын туругун, Дьиэ кэргэн сылыгар ийэ-аҕа буолууну, дьиэ кэргэн сыаннастарын харыстыырга судаарыстыбаннай бэлиитикэ, о.д.а. туһунан кэпсэттилэр.
Пуорум биир умнуллубат түгэнинэн, Татарстаны кытары быһа холбонуу буолла. Онно эмиэ дьахталлар мунньахтара буола турар эбит. Икки өрөспүүбүлүкэ үлэһит дьахталлара бэйэ-бэйэлэригэр эҕэрдэлэрин тиэртилэр. Маны тэҥэ, Татарстан идэлээх сойуустарын бэрэссэдээтэлэ Елена Кузьмичева Арассыыйаҕа идэлээх сойуустар үлэһит дьахталлар бырааптарын хайдах көмүскүүллэрин туһунан кэпсээтэ.
Эбиэт кэнниттэн ырытыһар, дьүүллэһэр былаһааккалар үлэлиэхтэрэ. Манна дьахтар доруобуйата норуот доруобуйатын мэктиэлиирин, дьиэ кэргэн үп-харчы өттүнэн балаһыанньата судаарыстыба сайдыытын тирэҕэ буоларын, үлэһит дьахтары социальнай өттүнэн өйөөһүн туһунан ырытыһыахтара.
Бу түмүгүнэн пуорум резолюцията ылыллан, СӨ бырабыыталыстыбатыгар, Ил Түмэҥҥэ, ФНПР-га тиэрдиллиэхтэрэ.
Бу күннэргэ Саҥа дьыл сүпсүлгэнэ саҕаланаары турар буолан, ас ырыынактарыгар испииһэк тутуурдаах дьон үксээбит. Өрүс…
“Дьоруойдар кэмнэрэ” бырагыраамаҕа кыттар сайаапкалары почтанан ылыы саҕаланна. Бу -- бырагыраама иккис түһүмэҕэ. Сайаапкалары билигин…
LETO куорат эйгэтин тупсаҕай оҥоруу киинэ Сэбиэскэй Сойуус Дьоруойа Федор Попов пааматынньыгын эскииһин оҥорууга күрэс…
Бу сыл ахсынньы 11 күнүгэр Былатыан Ойуунускай аатынан судаарыстыбаннас түмэлигэр киэн туттар биир дойдулаахпыт, комсомольскай,…
Филиппиныттан уонна Таилантан ахсынньы 14 күнүгэр ыытыллар «Вызов Севера» күрэхтэһиигэ кыттар боксердар бүгүн Дьокуускайга саамай…
Саха сиригэр анал байыаннай дьайыы кыттыылаахтарыгар уонна кинилэр дьиэ кэргэттэригэр анаан "Е-Якутия" порталга «Забота» электроннай…