«Үп пирамидатын» тэрийбит дьахталлар сууттаннылар

«Үп пирамидатын» оҥорон, 22 мөлүйүөн харчыны уорбут дьахталлар сууттаннылар. Бу туһунан Дьокуускай куорат борокуратууратын пресс-сулууспата иһитиннэрэр.

Суут быһаарбытынан, 2019 сыллаахха бу сууттаммыт  дьахтар икки билэр киһитин тылыгар киллэрэн, «үп пирамидатын» тэрийбиттэр. Бу «пирамидаҕа» 20 тыһыынча солкуобайы уган баран, 10 күнүнэн 40 тыһыынчаны ылаҕыт диэн, араастаан эрэкэлээмэлээн, дьонтон харчы хомуйан барбыттар. Сымыйанан «байбыт», «ситиһиилээх» дьон санааларын таһаараллар эбит.

Ол курдук, 456 киһини албыннаан, 22 мөлүйүөн солкуобайы ылбыттар. Бу харчыны бэйэлэрэ билэллэринэн айбардаабыттар, туттубуттар. Ыарахан сыаналаах тиэхиникэни, кыбартыыралары атыыласпыттар, кирэдьииттэрин саппыттар.

Суут судаарыстыбаннай буруйдааччы санаатын учуоттаан, «пирамиданы» тэрийээччини 7 сылга көҥүлүн быста (оҕото 14 сааһын туолуор диэри суут быһаарыыта тохтоон эрэр), иккис буруйданааччы 5 сылга көҥүлэ быһылынна. Бу дьахтары суут саалатыттан хаайыыга илтилэр диэн СӨ Борокуратуурата иһитиннэрэр.