Үрүҥ Хайаҕа пластик бытыылкалары тутан саҕалаатылар

Анаабыр улууһун Үрүҥ Хайа бөһүөлэгэр пластик бытыылкалары тутан саҕалаабыттар.

Бытыылкалары хомуйуу сүрүн соругунан нэһилиэги ыраастык тутуу буолар.

Бу туһунан нэһилиэк баһылыга Егор Валерьевич Спиридонов санаатын үллэһиннэ:
— Биһиги сэтинньи ый 11 күнүттэн нэһилиэкпит дьокутааттарын кытта биир сүбэнэн толкуйдаан, нэһилиэк ыраас буоларын туһугар пластик бытыылкалары тутан саҕалаатыбыт. Ол курдук нэһилиэкпит иһинэн бу бырайыагы өйөөн  балачча элбэх киһи аҕалан бытыылка бөҕөтүн туттарда. Иккилии лиитэрэлээх бытыылкалары уоннуу солкуобайга, оттон кыралары биэстии солкуобайга тутабыт. Уон бытыылканы туттарбыт киһи 100 солкуобайы ылар. Пластик бытыылка иһин төлөнөр үбү нэһилиэк дьокутааттара уйуннулар. Мэҥэ Хаҥалас улууһун Аллараа Бэстээҕэр пластик бытыылкалартан тротуар оҥороллор үһү диэни олохтоохтор «Саха» НКИХ ханаалыгар көрөн бэркэ сэргээбиттэр этэ. Онон биһиги эмиэ маннык мунньан икки куобаҕы өлөрүөхтээхпит. Биһиэхэ аспаал оҥоһуллар кыаҕа суох, онон нэһилиэкпит иһигэр пластик бытыылкаттан тротуар оҥоруохпутун баҕарабыт.