Үс эһэчээни Владивостокка ыытыахтара

Бэҕэһээ, бэс ыйын 3 күнүгэр, Мииринэйтэн Дьокуускай аэропордугар АЛРОСА авиахампаанньа үс эһэни аҕалла.

Ийэтэ суох хаалбыт 2-3 ыйдаах эһэ оҕолоро Чернышевскай таһыгар сылдьыбыттар. Эһэчээннэри бөһүөлэк олохтооҕо көрөн, ыттартан быыһаабыт уонна салгыы көмөлөһөллөрүгэр мииринэйдэргэ туттарбыт.

Ийэ көрүүтэ суох хаалбыт кыра эһэчээннэр айылҕаҕа тыыннаах хаалаллара уустуга өйдөнөр. Дьокуускайга быстах хорҕойор сирдэрин бэлэмнээбиттэр. Онтон бүгүн, бэс ыйын 4  күнүгэр, Владивостокка дьиикэй кыыллары, баабырдары реабилитациялыыр кииҥҥэ ыыталлар. Онно кинилэргэ көмөнү оҥоруохтара.

Хаартыскалар: Дьокуускай аэропордун пресс-сулууспатыттан