Үс Хоһууҥҥа тимир иҥиирдээх мадьынылар киирсиэхтэрэ

Бүгүҥҥүттэн үс күн устата Үөһээ Бүлүүгэ «Үс Хоһуун» успуорт уораҕайыгар СӨ успуордун маастара, Саха сирин III спортивнай оонньууларын абсолютнай чөмпүйүөнэ Александр Кузнецов сырдык кэриэһигэр мас тардыһыыга «А» категорияҕа өрөспүүбүлүкэтээҕи турнир ыытыллар.

Күрэххэ Мэҥэ Хаҥалас, Томпо, Ньурба, Бүлүү, Сунтаар, Хаҥалас, Горнай, Чурапчы улуустарыттан, киин куорат АГАТУ-ттан уонна Үөһээ Бүлүү улууһуттан мадьынылар кыттыылаах сытыы киирсиилэр буолуохтара. Төрүт успуорт оонньууларыгар кэмпилиэк мэтээллэри эр дьоҥҥо, дьахталларга, бэтэрээннэргэ, алын уонна улахан саастаах уолаттарга оонньотуохтара. Турнир бүтэһик күнүгэр, ахсынньы 8 күнүгэр, 75 киилэҕэ диэри уонна 75 киилэттэн үөһэ ыйааһыннаах кыайыылаах чөмпүйүөннэр ортолоругар турнир сүрүн бириистэрэ туруоруллуохтара. Ону кытта ыйааһыннарынан эр дьоҥҥо, дьахталларга, бэтэрээннэргэ абсолютнай чөмпүйүөннэригэр супер бириис — убаһа оонньонуо.