Үс тыһыынчаттан тахса киһи тииһин эмтэттэ

Стоматологтар бөлөхтөрүн мобильнай биригээдэтэ быйыл улуустарга уон иккитэ сырытта.

Онон Аллараа Халыма, Эдьигээн, Орто Халыма, Аллайыаха, Үөһээ Халыма, Булуҥ, Абый, Усуйаана, Өлүөхүмэ, Анаабыр уонна Муома олохтоохторо тиистэрин эмтэтэн, ылларан абыранан олороллор.

«Айаҥҥа-сырыыга уустук суоллаах-иистээх нэһилиэнньэлээх пууннар учуоттаныллыбыттара, барыта кичэллээхтик былааннаммыта. Ол түмүгэр, 3582 киһи тииһин эмтэттэ, ыллаттарда. Итинтэн өссө 2 256 — оҕо. Маны сэргэ, улахан дьону уонна оҕолору кытары өйдөтөр-сүбэлиир, сырдатар бэсиэдэлэри оҥордубут«, — диэн этэллэр.

Санатан эттэххэ, Ил Дархан Айсен Николаев көҕүлээбит арктическай мэдиссиинэ саҥа сүүрээнэ 2023 сыл олунньуттан саҕаламмыта. Уустук суоллаах-иистээх нэһилиэнньэлээх пууннарга суох, тиийбэт исписэлиистэр элбэх хайысхалаах биригээдэлэргэ  киирбиттэрэ.

«Мобильнай биригээдэлэр өрөспүүбүлүкэтээҕи кииннэрэ» бырайыак кэҥээн, Саха сирин өссө элбэх олохтооҕун хабар соруктаах үлэлиир.

СӨ Ил Дарханын уонна Бырабыыталыстыбатын пресс-сулууспата